"Әкем, шешем және мен" сайысының сценарийі

Бастауыш сыныпта дене шынықтыру сабағы бойынша сыныптан тыс жұмыстар оқушылардың денсаулығын нығайтуға, қимыл-қозғалыс белсенділігін арттыруға және спортқа деген қызығушылығын дамытуға ықпал етіп, оларды белсенді өмір салтына баулиды. Сондай жұмыстарымның бірі 4-сынып оқушылары мен олардың ата-аналарына арналған «Әкем, шешем және мен – спорттық жанұя» сайысы.

Мақсаты: Отбасы мүшелерін спортқа баулу, салауатты өмір салтын насихаттау; ата-ана мен баланың ынтымақтастығын арттыру, бір-біріне деген құрметін күшейту; көңілді атмосфера орнатып, спорттық жарыстар арқылы ұйымшылдықты нығайту.

Қатысушылар: 4-сынып оқушылары, олардың ата-аналары (әкесі мен анасы).

Көрнекіліктер: Шарлар, плакаттар, спорттық құралдар (доп, шеңбер, конустар, секіртпелер және т.б.).

Әділқазылар алқасы (мұғалімдер, мектеп әкімшілігі).

Жүргізуші:

– Құрметті ұстаздар, ата-аналар және жас спортшылар! Бүгінгі «Әкем, шешем және мен – спорттық жанұя» сайысына қош келдіңіздер! Біздің мақсатымыз – отбасылық қарым-қатынасты нығайтып, салауатты өмір салтын дәріптеу. Бүгінгі жарыста тек жылдамдық пен ептілік емес, ұйымшылдық пен достық та сыналады.

(Әрбір отбасы өзін таныстырады: ұраны мен қысқаша таныстыруы беріледі.)

Жарыс кезеңдері

1. «Жылдамдық жарысы» (Эстафета). Әке – 5 рет допты айналдырып дриблинг жасап өтеді. Ана – секіртпемен 10 рет секіреді. Бала – кеглилерді айналып жүгіріп, мәреге жетеді.

2. «Отбасылық секіріс» Отбасы мүшелері бір-бірінің қолынан ұстап, қатарымен 10 рет секіруі керек.

3. «Допты дәлдікпен жеткіз». Әке мен ана шеңбер ішінде тұрып, бастарын тигізбей допты иықпен қысып, белгіленген межеге дейін жеткізуі керек.

4. «Кім күштірек?» Әке қол күресінен сайысқа түседі. Ана шар үрлеу сайысына қатысады (3 шарды тез үрлеп байлау керек). Бала 15 рет отырып-тұрады.

5. «Серпінді шеңбер»

Отбасы мүшелері бір-бірінің қолынан ұстап, шеңбердің ішіне тұрып, оны кезекпен айналдырады.

Қорытынды және марапаттау

Жүргізуші:

– Міне, құрметті көрермендер, біздің сайысымыз мәресіне жетті! Жеңімпаз – ең ұйымшыл, епті, жылдам, мықты отбасы! (Әділқазылар жеңімпаздарды марапаттайды: «Ең ұйымшыл отбасы», «Ең көңілді отбасы», «Ең шапшаң отбасы» номинациялары беріледі.)

Жүргізуші:

– Баршаңызға белсенділік танытқандарыңыз үшін алғыс білдіреміз! Әрқашан спортты серік етіп, салауатты өмір салтын ұстаныңыздар!