Орындаған; Әбілқасым Зарина

Журналистика- 3 курс,2 топ

Алғыс айту күні

Алғыс айту күні — Қазақстанда жыл сайын бірінші наурызда атап өтілетін ерекше мереке. Бұл күн еліміздегі түрлі этнос өкілдерінің бір-біріне және қазақ халқына қиын-қыстау кезеңдерде көрсеткен мейірімділігі мен қонақжайлылығы үшін алғыс білдіруін білдіреді. Мереке екі мың он алтыншы жылы Қазақстан Республикасының Тұңғыш Президенті Нұрсұлтан Назарбаевтың бастамасымен енгізілді.

Алғыс айту күні Қазақстан халқы Ассамблеясының құрылған күнімен тұспа-тұс келеді. Мың тоғыз жүз тоқсан бесінші жылы бірінші наурызда құрылған Ассамблея еліміздегі этносаралық келісім мен бірлікті нығайтуда маңызды рөл атқарады. Мереке алғаш рет екі мың он алтыншы жылы атап өтілді.

Бұл күннің тарихи маңызы зор. Өткен ғасырдың отызыншы-қырқыншы жылдарында Кеңес Одағының солақай саясатының кесірінен көптеген этностар Қазақстанға күштеп қоныс аударылды. Қазақ халқы сол қиын-қыстау кезеңде жер аударылғандарды құшақ жая қарсы алып, қолдау көрсетті. Алғыс айту күні сол замандағы мейірімділік пен адамгершіліктің символы ретінде атап өтіледі.

Алғыс айту күні — қайырымдылық дәстүрлерін, әлеуметтік ынтымақты және өзара көмек көрсетуді қолдау күні. Бұл — репрессия мен жер аудару жылдарында қазақ халқы көрсеткен мейірімділік пен ақ көңілдік, қолда бармен бөлісу, көмек көрсету сынды рухани дәстүрлер күні.

Мерекенің басты мақсаты — өскелең ұрпақты достық, бір-біріне деген құрмет пен толеранттылыққа, отансүйгіштікке тәрбиелеу, Қазақстанда этникаралық келісім мен ұлтаралық қарым-қатынасты нығайту.

Алғыс айту күні Қазақстанда жаңа мереке болғандықтан, оны тойлау дәстүрінің негізі енді ғана қаланып жатыр. Бірақ бұл мейрам бүгінде еліміздің тұтастығын құрайтын әрбір этностың мәдениеті мен рухани құндылықтарын көрсетеді. Ұлттық мерекенің барлық іс-шарасы ортақ тарихи жадының, қазақ ұлтына деген ризашылықтың көрінісіне айналды.

Қазақстанда Алғыс айту күні қалай тойланады? Бірінші наурызда мәдениет, өнер, білім беру мекемелерінде, мұражайлар мен кітапханаларда мерекелік шаралар өтеді. Барлық аймақтағы Достық үйлері ұлт өкілдеріне қолдау көрсететін орталыққа айналды. Елордада “Қазақ еліне мың алғыс” монументі жанында өтетін салтанатты алғыс айту шарасы осы күннің маңызды шараларының бірі саналады. Еліміздің түкпір-түкпірінде концерттер, көрмелер мен этномәдени шығармашылық жәрмеңкелер ұйымдастырылады. Бүгінгі күні қайырымдылық концерттері мен мынадай іс-шараларды өткізу дәстүрге айналды:

1. Қиын-қыстау заманда елімізге жан сауғалап келген жандар үшін аштық пен дерттен құтқаруға себеп болған қымыз және басқа да ұлттық өнімдер мен тағамдарға арналған көрмелер.

2. Соғыс және еңбек ардагерлеріне алғыс білдіру акцияларында ел үшін тер төккен тұлғаларды өскелең ұрпақ құттықтап, алғыс хаттар, азық-түлік қоржындарын табыс етеді.

Алғыс айту күнінде білім ошақтарында түрлі шаралар өтеді. Негізгі мақсат балаларды мейірімділікке, ұқыптылыққа, айналадағы адамдарға жанашырлықпен қарауға тәрбиелеу болып саналады. Мектептерде “Қазақстан – бейбітшілік пен келісім елі”, “Достық шаңырағының астында”, “Қазақстан – біздің ортақ үйіміз” атты символикалық атаулармен сынып сағаттары, патриоттық сабақтар ұйымдастырылады. Қазақстан халқы Ассамблеясының ғылыми сарапшылары мемлекеттік мекеме қызметкерлері мен студенттерге дәрістер топтамасын оқиды.

Қазақстанда өмір сүретін халықтар үшін көктемнің алғашқы күні “рахмет” сөзімен басталады. Еліміздегі әрбір этностың бастан кешкен тағдыры олардың діліне де әсер етіп, ортақ құндылықтар мен мұраттарды қалыптастырды. Осылайша алғыс айту күні түрлі мәдениет пен патриотизмнің мерекесіне айналды.

Алғыс айту күні — Қазақстан халқының бірлігін, достығын және мейірімділігін дәріптейтін мереке. Бұл күн еліміздегі түрлі этнос өкілдерінің бір-біріне және қазақ халқына алғыс білдіруімен ерекшеленеді. Мереке қоғамдағы өзара түсіністік пен сыйластықты нығайтуға, болашақ ұрпақты толеранттылық пен патриотизмге тәрбиелеуге ықпал етеді.