Астана – ел мақтанышы, ұлттың асқақ арманы

Елорда – әрбір мемлекеттің бет-бейнесі, оның даму деңгейі мен болашаққа деген ұмтылысын айқындайтын басты нышан. Қазақстан үшін мұндай мәртебелі мекен – Астана. Тәуелсіздігімізбен бірге түлеп, аз уақыт ішінде әлем таныған шаһарға айналған елорда бүгінде мемлекетіміздің ең үлкен жетістіктерінің бірі саналады.

Астана тарихының тамыры тереңде жатыр. 1830 жылы Ақмола бекінісі ретінде іргесі қаланған бұл өңір уақыт өте келе маңызды әкімшілік және экономикалық орталыққа айналды. Егемендік алғаннан кейін еліміз үшін жаңа астана таңдау мәселесі күн тәртібіне шықты. Нәтижесінде 1997 жылы ел астанасы Алматыдан Ақмолаға көшіріліп, тарихи шешім қабылданды. Ал 1998 жылы қалаға Астана атауы берілді. Бұл қадам Қазақстанның жаңа дәуірге қадам басқанын білдірді. Сол уақыттан бері елорда адам танымастай өзгерді. Кең жазира Сарыарқаның төсінде бой көтерген заманауи ғимараттар, сәулеті келіскен кешендер мен зәулім нысандар Астананың ерекше келбетін қалыптастырды. Бәйтерек монументі, Ақорда, Бейбітшілік және келісім сарайы, Хан Шатыр секілді сәулет туындылары елорданың ғана емес, бүкіл Қазақстанның мақтанышына айналды.

Бүгінде Астана – саяси шешімдер қабылданатын орталық қана емес, ғылым мен білімнің, мәдениет пен инновацияның ордасы. Мұнда әлемдік деңгейдегі форумдар, халықаралық кездесулер мен маңызды іс-шаралар өткізіліп келеді. Әлемнің түкпір-түкпірінен келген қонақтар жасампаз қаланың қарқынды дамуына тәнті болып, Қазақстанның әлеуетіне жоғары баға береді.

Астана – жастар қаласы. Еліміздің түкпір-түкпірінен келген талапты жастар осы шаһарда білім алып, армандарына қанат бітіруде. Қала күн сайын жаңарып, жаңа мүмкіндіктерге жол ашып келеді. Сондықтан елорда әрбір жас үшін үміт пен өрлеудің мекені болып саналады.

Астана күні – бір ғана қаланың мерекесі емес. Бұл – тәуелсіз Қазақстанның жетістіктерін дәріптейтін, ел бірлігі мен ынтымағын нығайтатын маңызды күн. Елорданың бүгінгі келбеті – халқымыздың қажырлы еңбегінің, мемлекетіміздің тұрақты дамуының айқын көрінісі.

Сарыарқаның сайын даласында бой көтерген сұлу шаһар уақыт өткен сайын жаңарып, көркейіп келеді. Астана – өткен мен келешекті жалғаған алтын көпір, тәуелсіздіктің тұғыры, ұлттың асқақ арманының жүзеге асқан бейнесі. Сондықтан елордамыздың мерейі әрдайым үстем болып, Қазақстанмен бірге қарыштап дами бермек.