"Астана күні" сыныптан тыс іс-шара

«Астана – Отанымыздың жүрегі, Тәуелсіздігіміздің тірегі»

атты ауылдық округтер арасындағы көркемөнерпаздардың 2018-жылғы байқауы бойынша Мариногорка селолық округінің концерттік бағдарламасы.

Өзен, көлдер қандай сұлу, тамаша

Көз тартады бұл көркіңе қараса.

Жасыл желек төселіп тұр бұл жерде,

Жайнап өскен гүлдері бар өзіңде.

Бұл қай жер – деп сұраса

Киелі Мариногорка жері де.

Қайырлы кеш, береке бақ дарыған, баянды елім Көкпекті!

Уа, халайық! Елбасымыздың «Рухани жаңғыру аясында» жүргізіліп отырған бағдарламасы, біздің ауыданымыздың да төрінен ойып тұрып орын алды. Аудан бойынша барлық мектептер мен мәдениет ошақтары қызу жұмысқа білектерін сыбана кірісті. Міне біз де бүгін сіздердің алдарыңызда өнерімізді көрсеткелі келіп отырмыз. Әр жыл өз қызығымен ерекшеленеді. 2018 жылдың да қуанышы мен берері мол. Міне, биыл Астанамызға – 20 жыл толмақ. Ендеше, «Астана – Отанымыздың жүрегі, Тәуелсіздігіміздің тірегі»- деп бүгінгі әніміз де, жырымыз да, биіміз де, саған тарту,Астана!

1. Әуелі қолдан келсе еліңді сүй,

Ел үшін еңбек еткен еріңді сүй.

Қағбаға тәуап ету керек болса

Кір жуып, кіндік кескен жерінді сүй!

Алдарыңызда «Туған жер» әнімен вокалды топты ортаға шақырамыз.

2. Астана – Қазақстанның жаңа қаласы. Оның шекарасы 710 шаршы шақырым. Тоғыз жолдың торабында, Республика территориясының төрінен орын тепкен. Астана күн сайын, сағат сайын өркендеп өсіп келеді. Шетелдік қонақтар оны дүниенің сегізінші кереметіне теңеп «інжу маржан» деп бағалауда. Сүйікті Елордамыз - Астана қаласы - болашақтың қаласы көз алдымызда өсіп келеді. Жаса, жайна ару қалам-Астанам! – деп айғайлағым келеді.

Смаилов Қадырбек ағамыздың орындауындағы «Көңіл сыры» әнін қабыл алыңыздар!

3. Астана қаласы 60 жылдардағы Тың игерудің орталығы болса, ал қазіргі таңда ақиқатқа арналған арман қала, дүниежүзі халықтарымен терезесі тең қазақ деп аталатын егеменді ұлттың, Тәуелсіз Қазақстанымыздың киелі ордасы. Астана-1998 жылы ЮНЕСКО-ның шешімімен «Әлем» қаласы сыйлығымен марапатталса, 2008 жылы сәурідің 5-де Мәскеуде «Мегаполис»:ХХІ ғасыр халықаралық форумы аясында «ТМД-ң үздік қаласы» атты алғашқы көрме байқауда 9 аталым бойынша жеңіске жетті. Әрине мақтанамыз, шаттанамыз!....

Қыздар вокалды тобының орындауында «Агроном» әні.

4. Ойхой жастық,

Би қадірін білетін тек сендер ме!

Билегенде тимейді, өкшең жерге

Мың бұралып, құбылып, құлпырасың,

Буырқанған толқындай жұлқынасын деп – ертістің толқынына теңелген жас қыздарымызды мың бұрылған билерімен ортаға шақырамыз.

«Қазақ биі»

5. Ұлы Абай атамызды қалай ғана еске алмаймыз, ол кісінің ән жолында салып кеткен сара жолы ешқашанда естен кетпейді. «Әнді сүйсең, менше сүй» деп атамыз айтқандай, алдарыңызда өзінің әсем дауысымен құлақ құрышын қандыратын қызымыз Қуанышева Индираны «Жан гүлім» әнімен ортаға шақырамыз.

Ду қол шапалақ ұрайық, ағайын!!!

6. Саусағынан бал тамған,

Сан түрлі бүгін күйші бар.

Бұрала басып билейтін,

Буынсыз сұлу биші бар – дегендей ерке қызымыз Алияның үнді биін тамшалаңыздар.

7. Ел ордасы - Отаным

Мақтанышы Астанам.

Қарыштап алға бассам да,

Сеніменен мақтанам

Отанымның жүрегі

Менің сүйікті Астанам!

Келесі әнші қыздарыңыз Гавриленко Арина «Я – казах» әнімен. Қарсы алыңыздар!

8. Қазақтың құлан жортса тұяғы тозатын, қыран ұшса қанаты талатын ұлан ғайыр даласы. Осы жер біздің еншімізге, ата-бабаларымыздан тиген. Ақ білектің күшімен, найзанын ұшымен Қабанбай батыр атамның ізі қалған Толағайдың тасында, шөлі қанып су ішкен Алтай-Ертіс көлінде, ердің ерінің қолынан ғана келетін ерлігің бар қазағымның бойында. Ол елдің аты – Қазақстан, ал ердің аты – Нұрсұлтан деп мақтанамыз.

Шәмші Қалдаяқовтың әніне жазылған «Арыстың жағасында» әнін қыздар вокалды тобынынң орындауында қабыл алыңыздар.

9. Ақша бұлттар аспанында

Ақ ботадай ойнақтаған, жас қала.

Жүз түрленіп қас-қағымда,

Жан сырына бойлатпаған, Астана.

Көшелері күнге ғашық,

Әрбір тасы ән салатын, Астана.

Жырын толғап, биге басып,

Жер-жаһанды қарсы алатын, жас қала,

Аппақ түнде арайыңды

Аңсап тұрып жұтып бағам, Астана.

Жусан иісі танауыңды

Жұпарымен қытықтаған, жас қала.

Еркелеген Есіл ару,

Бұрымдары жарқылдаған, жас қала.

Таңы — сұлу, кеші — дәру,

Ақ самалы аңқылдаған, Астана – деп, ортаға бишілерімізді шақырамыз. «Алға, Қазақстан!» Флешмоб.

10. Көз тіккен төрткүл дүние алты Алашы

Бұл бүгін қазағымның бас қаласы.

Елордам халқым үшін ерен бөлек-

Тәуелсіз елдің Астанасы!

ендеше дәл қазір ортаға ауылымыздың әншісі Ибатолла ағамызды «Арман жолдар» әнімен шақырайық. Қарсы алыңыздар!

11. Саусағынан бал тамған өнерлі ғой халқымыз,

Өнеріміз арқасында жайылды ғой даңқымыз.

Алдарыңызда өнерлі қыздарыңыз Мукушева Назым. Ұйғыр биі.

12. Көз тігіп, қызғана да қуана қарайтындар аз емес. Аз уақыттың ішінде тәуелсіз мемлекет атанып, өз қолымыз өз аузымызға жетіп, бөркімізді аспанға аттық. Салт дәстүрімізді қайта жаңғарттық. Бір кезде өшіп кете жаздаған дінімізді қайтардық. Көк туымыз көк аспанға желбіреді. Бейбітшілік тілеген халықтың біріміз.

«Мәңгілік ел» әнін вокалды топтың орындауында қабыл алыңыздар!

13. Көк орай шөбім,

Жайқалып егін,

Байлыққа толы кең дала.

Көркейіп өсіп,

Жайқалып жетіп,

Келесің міне күн қала.

Самал жел ескен,

Жастарым өскен,

Бақытым сенсің, Астана.

Асқарым болар,

Ырысым толар,

Айналдым сенен, Астана.

Сахнада Асылбаева Әнел қыздарыңыз, «Қазақ биі»

14. Қуанам осы елде туғаныма,

Кір қонды мөлдір суға жуғаныма .

Қызыңмын, ер жүрегім елжіреген

Намысты қолдан ешкімге, бергізбеген! – дейді келесі «Журавли» әнін орындаушы Резник Татьяна. Қабыл алыңыздар!

15. Әр елдің алға қойған мақсат-жоспары бар. Сол мақсат пен мүддені іске асырушы біз жастармыз. Жыл сайынғы Елбасының жолдауындағы меңзеу де елі үшін, Отанымыз үшін емес пе? Халықтың бірлігін, тыныштығын бұзбайтын жақсы ұрпақ тәрбиелейтін сіз бен біз. Сол Астана жаңа Қазақстанның қуаты және оның көпұлтты халқын біріктірудің қайнар бұлағы.

Шынарбек Ерланның орындауында «Аяулым» әні.

16.«Күн сүйіп Сарыарқаның даласында

Таранған аққудай боп қала осында.

Жүрегі еліміздің Астана ол

Есілдің еркелеп аққан жағасында.

«Менің Қазақстаным» атты сахналық қойылымды тамашалаңыздар!

17. Иә, Астана! Бүгін сені ән мен жырға қостық. Өзіңнен талай жақсылық тостық. «Ел болам десең, бесігіңді түзе» дегендей алдымызда талай атқарылатын істер бар, ағайын! Үштілдікті алға ұстап, жас ұрпақты тәрбиелеуде үлкен маңызды істерді атқару, әрқайсымыздың міндетіміз. Ендеше: Мен Қазақпын

Қайсарлықпен шыңдалған.

Бабалар ұрпағымын жалындағын

Санамда іздер қалды ұлағатты,

Сыйлайтын, қастерлейтін ата салтты.

Көгімде көк байрағым желбіреген

Нәр алдым, қуатпенен өстім сенен.

Жайнай бер, жаса мәңгі жас астана

Елімнің нақ ордасы – Бас Астана! – дегенімдей келесі вокалды топтың орындауында «Елім менің» әні.

Құрметті ағайын! Осымен Астананың 20-жылдығына арналған Мариногорка өңірінің бүгінгі концерттік бағдарламасын аяқтаймыз!

Ел ішіне: бірлік пен береке,

Күндегі жүрген күніміз, мереке болсын!

Халықтың басынан бақ кетпесін!

Көңіл қойып, тыңдағандарыңызға көп рахмет!