Ашық сабақ Азық түлік дүкенінде А1-02-18 тобы

Тобы:А1-02-18, А1-03-18

Сабақ №22 Күні:2.09.2018 жыл

Сабақтың тақырыбы: Азық-түлік

Сабақтың мақсаты: азық-түлік дүкені, ұлттық тағам атауларына байланысты жаңа сөздер арқылы тыңдаушылардың тіл байлығын арттыру; тыңдаушылардың бойына ұлттық сезімді қалыптастыру, қазақ ұлтының тағамды берудегі ұлттық ерекше дәстүрлерін сақтауға үйрету.

Сабақтың түрі: аралас сабақ

Сабақтың әдісі: түсіндіру, сұрақ-жауап, әңгімелеу, ой-толғаныс, баяндау, ұжымдық ойлау, пікір тастау стратегиясы, сұхбаттасу.

Көрнекі құрал-жабдықтар: компьютер, мәтін, сөздік, перфокарталар, мақал-мәтелдер, слайд.

Сабақтың жоспары: I Ұйымдастыру кезеңі

II Үй тапсырмасын сұрау

III Жаңа сабақ

Оқылым

Жазылым

Тыңдалым

IV Жаттығу жұмыстары

V Сабақты бекіту

VI Үйге тапсырма

Сабақ барысы:

I Ұйымдастыру кезеңі

1. Тыңдаушылармен сәлемдесу;

2. Тыңдаушылар назарын сабаққа аудару;

II Үй тапсырмасын сұрау

Ой шақыру

Әр елдің ұлттық тағамдары туралы не білесіз?

- Дастарқанның сәні не? (нан, хлеб, брэд)

- Адамдардың сүйіп ішітін сусыны не? (шай, чай, ти).

- Шай дәмді болу үшін шайға не қосады? (сүт, молоко, милк)

- Шайымыз тәтті болу үшін не қосамыз? (қант, сахар, щуга).

- Осы тағамдарды біз қайдан сатып аламыз? (дүкеннен)

- Қандай дүкеннен? (азық-түлік).

- Дұрыс, азық-түлік дүкенінен сатып аламыз. Ендеше бүгінгі сабақтың тақырыбы «Азық-түлік дүкенінде» деп аталады. (Слайдтан сабақтың тақырыбы көрсетіледі)

Жаңа сөздермен танысыңыз.

Әр елдің ұлттық тағамдары туралы не білесіз?

III Жаңа сабақ.

Суреттегі азық – түлік атауларын қолданып «Азық-түлік дүкенінде»

тақырыбында әңгіме құрастырыңыз.

Оқылым. Мәтінді оқыңыз.

Ас – адамның арқауы

Ас – адамның арқауы. Адам ағзасы түрлі аспен қоректеніп, күш жинайды. Жалпы тағамдар ет, сүт, дәнді-дақылдардан жасалады. Олардың әрқайсысы адам ағзасы үшін пайдалы. Ет өнімдері дәмділігімен және өзінің құрамындағы адам ағзасына пайдалы ақуыз заттарымен құнды. Қазақтың дәстүрлі дастарқанында күріш, бидай, жүгері, тары сияқты дән азықтарынан дайындалатын тағамдар да өте мол. Бұл тағамдар дәрумендерге бай, ағзаға сіңімді келеді. Майға қуырған қып-қызыл бидай, аппақ баданалы жүгері дастарқанның сәні емес пе?

Сүт тағамдары денсаулыққа аса пайдалы. Кезінде академик И.П.Павлов: «Сүт – табиғаттың өзі дайындаған тамаша тағам» деп бағалаған болатын. Шындығында қоректік жағынан алғанда сүт – тағамдық құндылығымен ағза үшін аса маңызды өнім. Сүт – сүт қоректі жануарлардың сүт бездерінен бөлінетін секрециялық сұйық. Адам баласының саналы тіршілігінің барысында өз қажетіне қарай лайықтап алған бұл табиғи өнімнің қоректік жағынан алғанда тағамдық құндылығы өте жоғары.

Сүт және одан өндірілетін өнімдер – өте сіңімді және адам ағзасы үшін пайдалы тағам. Сүттен қаймақ, кілегей алынып, сары май шайқалады. Сиыр, қой, ешкі сүтінен айран ұйытылып, май шайқалса, бие сүтінен қымыз, түйе сүтінен шұбат ашытылады.

Сүтті жас баладан еңкейген кәріге дейін ішеді. Өйткені ол дәрумендерге, қышқылдар мен майларға, ақуыз бен минералды заттарға, микроэлементтер мен ферменттерге өте бай. Бір сөзбен айтқанда, сүт – химиялық құрамы жағынан тамаша тағам. Себебі оның құрамында адам ағзасының қалыпты жетілуі үшін қажетті барлық заттар бар. Соған орай физиологиялық құндылығы жағынан бір де бір азық тең келе алмайды. Сүттің тағы бір ерекше қасиеті – ас қорыту бездерінің жұмыс істеу қабілеті үнемі жақсартып отыру.

Сүтті пайдаланып әртүрлі тағамдар дайындауға болады. Айран ұйытып, ірімшік, құрт кептіруден бастап, ботқа пісіруге дейін осы бір ерекше өнім пайдаланылады. Ал сүт қосылып дайындалған тағам өте дәмді болады. Оның үстіне сүт өнімдерінің дәрулік қасиеті бар. Олар емдеу, түрлі аурудың алдын алу және диеталық тағам ретінде де қолданылып жүр.

Сүт өнімдерінің ерекше бір түрі – уыз. Уыз – жаңа төлдеген малдың қою сүті. Қазақ халқы оны қара уыз, сары уыз, ақ уыз деп үшке бөледі. Қара уыз – төлдеген малдың төлі еметін алғашқы уызы. Сары уыз – төлі емгеннен кейін сауылатын уыз. Ақ уыз – бір күннен кейін сауылған уыз.

Уыз – қазақ халқының аса дәмді әрі сүйікті ұлттық тағамы. Ол – адам ағзасына өте пайдалы ас.