Сабақтың мақсаты: «Жер-ана» туралы айта отырып, қиянат жасамау кұндылығының мәнін ашу.

Міндеттері:

-Оқушыларға жердің адам өміріндегі маңыздылығын түсіндіру;

- Оқушылардың жерге жақсылық жасайтын қасиеттерін дамыту;

- Оқушыларды әрқашан көмектесу арқылы жерге қамқорлық жасауға тәрбиелеу;

Ресурстар:

Кітап, дәптер, аудиотаспа, ән мәтіні, стикерлер

Сабақ барысы:

1. Ұйымдастыру кезеңі. 5Т ережесі: тәртіп, талап, тыныштық, тазалық, татулық

Аманбысың ,алтын күн!

Аманбысың, жарқын күн!

Маған жылу, жарық бер,

Қуаныш пен шаттық бер.

Барлығымыз бірге қосылып айтамыз

Сабақ барысын талқылау

2.Үй тапсырмасын тексеру.

Э.Шимның «Көктем иісі» әңгімесі

Сұрақтар:

-Бала көктем иісін қалай сезінді?

-«Көктемнің иісі» деген ұғымды сендер қалай түсінесіңдер?

-Жерге қалай жақсылық жасауға болады?

3. Дәйексөз.

«Баптағанға – жер жомарт. »

Халық мақалы

-Дәйексөздің мағынасын қалай түсінесіңдер?

-Неліктен жер өзін баптағанға жомарттық көрсетеді?

2-рет ұлдарға, 2- рет қыздарға айтқызу.

Бірге қосылып айту. Дәптерге жазып алу

4.Әңгімелесу. (Мұғалім сыйы)

Тбилиси қаласындағы ботаника ғылыми зерттеу институтында биолог ғалым Кохладзенің басқаруымен мынадай тәжірибе жүргізілді. Бақтағы екі түп раушан гүліне екі адам жібереді. Бірінші адам гүлдің сабақтары мен өзегіне ине тығып, зекіп, азап көрсетеді. Екінші раушан шоғына барған бағбан оған су құйып, небір тамаша жылы сөздер айтады. Екі шоқ гүлге сезгіш аппарат хабарлағыштар орнатып қояды да, әлгі тәжірибеге қатысқан адамдардың әрқайсысын өз гүлдеріне қайта жібереді. Сонда азаптаған адам жақындап қалғанын сезген гүл «ай-ай, әлгі қатыгез тағы да келе жатыр» дегендей хабарлағыш (датчик) зарлай жөнеледі. Ал, келесі бағбан жақындағанда гүл жұпар иісін шашып, қауызын ашқан.

Міне, бұл табиғатқа қиянат жасасаң, сөзсіз соның зардабын тартасың дегеннің дәлелі.

- Зерттеу институтындағы қандай тәжірибе жүргізілді?

-Табиғат тірі жан сияқты, өзіне зәбір көрсеткенде қиналуы мүмкін бе?

-Табиғатты қорғауда адамның іс –әрекеті қандай болу керек?

5.Шығармашылық жұмыс.

Жер- бәріміздің анамыз. Онсыз тіршілік жоқ.Өйткені... Жер-бәріміздің асыраушымыз. Өйткені... сөйлемді жалғастырып жазу

6.Топпен ән айту.

Атамекен

Жасыл жайлау, түкті кілем, көк кілем,

Көк кілемде көп ойнаймын, көп күлем.

Маңдайымнан сипап өткен самалды

Қазағымның алақаны деп білем.

Қайырмасы:

Қайда жүрсем атамекен,

Көкейіңде жатады екен.

Күннің өзі қимай оны

Ұясына батады екен.

Жасыл жайлау, түкті кілем, көк кілем,

Көк кілемде көп ойнаймын, көп күлем.

Күннің нұрын, айдың аппақ сәулесін

Қазағымның махаббаты деп білем.

Қайырмасы:

Жасыл жайлау, түкті кілем, көк кілем,

Көк кілемде көп ойнаймын, көп күлем.

Асқар тауын аспаныммен астасқан,

Қазағымның мәртебесі деп білем

Ән мәтіні таратылады

7. Үй тапсырмасы

Ы.Алтынсариннің «Таза бұлақ» әңгімесін оқу

8.Соңғы тыныштық сәтi. (3мин)

Ыңғайланып отырыңыздар, денелеріңді түзу ұстаңыздар. Көздеріңізді жұмуларыңызды өтінемін.

- Енді осы сабақта айтылған ойлар мен істерді ой елегінен өткізіп көрейікші.

- Барлық айтылған жақсы ойларды жүрегіміздің түкпіріне апарып орналастырайық.Жақсы сөз сөйлейік,жақсы ой ойлайық,жақсы іс жасайық.

- Енді көздеріңізді аша қойыңдар.Сабақ аяқталды.Бүгінгі күндерің қуаныш әкелсін!

Баяу әуен қойылады