Ашық сабақ "Түстер"

Тақырыбы: Түстерді ажырату.

Мырзағазиева Гүлнар Ерназарқызы,

Қызылорда облысы, Шиелі кенті,

№ 3 Облыстық балалар оңалту

орталығының тәрбиешісі

Сабақтың мақсаты: Балаларға түстер туралы ұғымын кеңейту.Түстердің атын білуге машықтандыру. Ойлау, сөйлеу,есте сақтау қабілеттерін арттыру, ұсақ қол моторикасын дамыту. Еңбексүйгіштікке, ұжымдасып жұмыс жасауға тәрбиелеу.

Көрнекілігі : слайд, түстерге байланысты суреттер, фетрдан жасалған құрастыру ойындары.

Әдісі: әңгімелеу, сұрақ-жауап, ойын, сергіту сәті, мадақтау.

Сабақ түрі: топтық

Ұйымдастыру кезеңі.

Балаларды сабаққа психологиялық тұрғыда даярлау.

Сәлем дейміз достарға,

Сәлем дейміз құстарға.

Сәлем дейміз бәріне,

Сәлем дейміз апайға.

- Балалар, бүгінгі сабағымыздың тақырыбы «Түстерді ажырату» деп аталады. Ендеше, балалар қандай түстерді білеміз?

-  Балалар, жарайсыңдар. Түстер адамға сән береді, айналаны сұлуландырады. Егер түстер болмаса барлығы көңілсіз болар еді. Сондықтан түстер бізге қажет екен. Бірақ, балалар мына суретке қарайықшы. Бұл суретте не бейнеленген?

-Бояуы жоқ алманың суреті.

- Дұрыс айтасыңдар.

-Ал, енді мына суретте алма қалай бейнеленген?

- Алманың түсі кызыл болды.

- Ендеше, балалар түстермен танысайық.

- Мынау қандай түс?

- Көк түс.

- Көк түске бұлттың, жалауымыздың түсі ұқсайды екен.

- Мынау қандай түс?

- Сары түс.

- Сары түске күннің, бананның түсі ұқсайды екен.

- Мынау қандай түс?

- Қызыл түс.

- Қызыл түске алманың, гүлдің түсі ұқсайды екен.

- Мынау қандай түс?

- Жасыл түс.

- Жасыл түске жапырақтың, қиярдың түсі ұқсайды екен.

- Міне, балалар түстердің түрін атап өттік, енді сол түстерге байланысты тақпақ айтып, ойын ойнайық .

«Сиқырлы су» ойыны.

Мақсаты: Түстерді ажырата білуге үйрету.

Шарты: 4 ыдысқа суды құйып қоямыз. Бетін орамалмен жауып шайқаймыз, сол кезде сиқырлы су 4түске боялады. Қызыл, сары, жасыл, көк түстер болады.

Тақпақ : Гүлдер, гүлдер шоқ гүлдер,

Қызыл, сары,көк гүлдер.

Жапырағы жасыл боп,

Тұра берші нұрланып.

«Құмырадағы гүлдер» ұжымдық ойын.

Мақсаты:Түстер туралы ұғымдарын қалыптастыру.

Шарты: Құмырадағы гүлдердің түстеріне қарай күлтелерін орналастыру.

Сергіту сәті.

Қызыл, сары, жасыл, көк,

Түстерді біз білеміз.

Сары күн, көк аспан,

Қызыл гүл, жасыл шөп,

Ауада суретін саламыз.

• Балалар қазір сендерге 2 ойын беремін.

1 ойын: « Жартысын тап» ойыны.

Мақсаты: Біріктіру қабілетін, ой-өрісін дамыту.

Шарты: Кесілген суреттердің жартысын қолдарына беріп, сол суреттердің жартысын тауып, бүтін суреттер құрастыру керектігі түсіндіріледі.

2 ойын: « Таяқшаларды түсіне қарай сал» ойыны.

Мақсаты: Түстерді ажырата білуге үйрету.

Шарты: 4 түске арналған қалталарға түстеріне қарай таяқшаларды орналастыру.

Қорытындылау: « Өз түсіңді тап» қимылды ойыны.

Балалар қолдарындағы түстеріне қарай топтасады. Ойнап жүріп, түстер жайлы қортындылаймын. Сабаққа жақсы қатысқан балаларды мадақтаймын.