Ата өнегесі – ұрпаққа үлгі

Ауыл ақсақалдары — елдің рухани тірегі, ұлттың болмысын сақтаушы тұлғалар. Олар өз өнегесімен, парасатымен, ұрпақ тәрбиесіне қосқан үлесімен ел жадында мәңгі қалады. Осындай ел игілігі үшін еңбек еткен ауылымыздың ардақты ақсақалы – Койбагаров Аяу Берікбайұлы.

Ол кісі ауылымыздың рухани-мәдени өмірінің жандануына үлкен үлес қосты. Өз бастамасымен ауыл орталығында мешіт салдыртып, елдің имандылық жолындағы бірлігін нығайтуға атсалысты. Мешіт тек құлшылық орны ғана емес, жастардың діни сауаттылығын арттыратын рухани орталыққа айналды. Ақсақалдың ұйымдастыруымен жасөспірімдерге арналған Құран оқу, имандылық сабақтары өткізіліп, балаларды адалдыққа, ізгілікке, сыйластыққа тәрбиелеу бағытында жұмыстар жүргізілді.

Оның өнегелі өмірі – жас ұрпаққа үлгі. Ақсақалдың елге сіңірген еңбегін насихаттау мақсатында мектептерде, мәдениет үйінде кездесулер, еске алу кештері ұйымдастырылып, мешіт жанынан «Жақсының аты — ел есінде» атты бұрыш ашу – үлкен тәрбиелік маңызы бар іс болмақ.

Осындай елжанды, иманды тұлғалардың өмір жолын насихаттау — жас ұрпақтың бойында рухани байлық пен адамгершілік қасиеттерді қалыптастырудың негізі.

Лицейімізде іске асырылып жатқан «Даналық мектебі» жобасы аясында «Ата өсиеті» тақырыбында ерекше мәні бар кездесу өткізілді. Іс-шара ауылымыздың рухани-мәдени дамуына зор үлес қосқан, мешіт салдыртып, елдің имандылығын арттыруға еңбек еткен марқұм Аяу атамыздың рухына арналды.

Кездесуге ақсақалдың ұлы – Койбагаров Абзал Аяуұлы арнайы шақырылып, әкесінің өмір жолы мен елге сіңірген еңбегі туралы естеліктерімен бөлісті. Ол әкесінің бала тәрбиесіндегі ұстанымдарын, ел ішіндегі беделі мен адамдық қасиеттерін айтып, оқушыларға үлгі боларлық өсиеттерін жеткізді.

Шара барысында оқушылар «Атадан қалған аманат», «Имандылық – ізгілік негізі» тақырыптарында өз ойларын ортаға салып, ардақты ақсақалдың өнегелі істерінен тәлім алды. Кездесудің соңында қатысушылар ақсақалдың рухына арнап дұға бағыштап, оның ел есінде қалатын еңбегін құрметпен еске алды.

Қорытындылай келе, бұл кездесу жас ұрпаққа ата дәстүрін қастерлеу, үлкеннің өнегесін ұлықтау, рухани байлықты бағалау қажеттігін терең ұқтырды. Осындай тағылымды кездесулер — лицей өміріндегі рухани тәрбиенің маңызды бөлігіне айналары анық.

Қызылтөбе лицейі 10-сынып оқушысы Әби Айжан

Жетекшісі: Койбагарова Роза Абзаловна