«Ата Заңым – Тәуелсіздік айғағы!»эссе

«Ата Заңым – Тәуелсіздік айғағы!»

Мамбетжанова Айгүл Түгелбайқызы

Қосымша білім беру педагогы

Шалқар ауданы «№4 ЖОББМ»КММ

Ата Заңым – Тәуелсіздік айғағы!

«Азаттығымыздың айшықты айғағы болған

Ата заң-тәуелсіздіктің теңдессіз тартуы!»

Н.Ә.Назарбаев

Кез келген елдің даму бағыттарын белгілейтін басты құжаты - Ата Заңы. Еліміздің Ата заңы ата-бабамыздың армандаған, мүддесін заң тілінде айшықтаған, жер шарына, адамзат ғаламына «Қазақстан» деген мемлекет бар екенін паш еткен ерекше құжат.

1991 жылы Қазақстан Республикасының мемлекеттік тәуелсіздігі туралы Заң қабылданды. Қазақстан Республикасының жаңа Конституциясын тұңғыш Елбасымыз Н.Ә.Назарбаев ұсынып, оны Қазақстан халқы 1995 жылы 30 тамыздағы Республикалық референдумда бір ауыздан мақұлдады.

Мемлекетіміздің ата заңының 1-бабында «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырды. Оның басты қазынасы-адам және адамның өмірі, құқықтары мен бостандықтары» - деген қастерлі сөзді кіргізген. Бүгінгі құқықтық мемлекет құрамыз деген заманда әрбір адам өз құқықтарын жете біліп, жалпы заң білімі саласынан мағлұмат алғаны дұрыс. Жеке адамның қадір-қасиетін мемлекет қорғайды, оны төмендетуге ештеңе негіз бола алмайды. Бала мен оның ата-анасы өз жолында сенімді, сабырлы болу үшін, қиындықтардан қорғану үшін өз құқықтары мен міндеттерін біліп, зерттеп және құқықтық мәдениетті үнемі дамытып отыру қажет. Әркімнің бостандыққа және жеке басына қол сұғылмауына құқығы бар, әркімге ой мен сөз бостандығына кепілдік беріледі, жеке меншік құқығы заңмен қорғалады, еңбек еркіндігі, әркімнің денсаулық сақтауға және медициналық көмекке құқығы бар, сонымен қатар мәдени құндылықтарға қол жеткізуге құқығы бар. Мамандықты өз бетінше таңдау, ауруханаға бару, конкурстық негізде университетке түсу, мұражайларға, мұрағаттарға бару – мұның бәрін Ата Заң қамтамасыз ете алады!

Шерхан Мұртаза ағамыз айтқандай: «Заң дегеніміз – ноқта», «Заң – мемлекеттің 9 қабат, тор көзді сауыты». Олай болса, біздің міндет – Конституцияға аса ұқыптылықпен қарау. Өзіміздің елімізді, өзіміздің тарихымызды, өзіміздің жетістіктерімізді қалай құрметтесек, оны да солай аялауымыз керек.

30 тамыз «Қазақстан Республикасы Конституция күні – мемлекеттік мереке. Конституция күні - Тәуелсіз Қазақстанның құқықтық өмірінде мән мен маңыздылығы жағынан ерекше орынға ие, халқымыздың ең жоғарғы дәрежеде атап өтетін басты мерекелерінің бірі. Конституция күні біз үшін қасиетті күн болу керек. Өйткені, Ата Заңымыз – Қазақстанның әлемдік өркениетке қарай қарыштай қадам басуының алғы-шарттарын жасап берген жасампаз құжат.