Бүгінгі таңда мектепке дейінгі тәрбие мен оқытудың маңызды бағыттарының бірі — балалардың тілін дамыту. Баланың тілі — оның ойлау қабілетінің, дүниетанымының, қарым-қатынас жасау мүмкіндігінің көрсеткіші. Балабақшада баланың сөйлеу дағдысын қалыптастыруда ойын ерекше орын алады.

Ойын — баланың табиғи әрекеті. Ол арқылы бала айналасындағы ортамен танысып, түрлі әлеуметтік рөлдерді меңгереді. Сонымен қатар, ойын кезінде балалар белсенді түрде сөйлейді, сұрақ қояды, жауап береді, әңгімелейді. Бұл — сөздік қорын молайтып, дұрыс сөйлеуге үйретудің тиімді жолы.

Тіл дамыту ойындарының түрлері өте көп:

— Сөздік ойындар (мысалы: «Кім жылдам?», «Ойлан, тап!») баланың ойлауын, сөйлеу логикасын дамытады.

— Дыбыстық ойындар (мысалы: «Қай дыбыстан басталады?», «Дыбысты тап») фонематикалық есту қабілетін жақсартады.

— Сахналау, рөлдік ойындар (ертегі қою, қуыршақ театры) арқылы балалар тілдік жағдаяттарға еніп, сөйлеу мәдениетін меңгереді.

Ойын барысында тәрбиеші балаға дұрыс сөйлеу үлгісін көрсетіп, оның сөзін толықтырып, жаңа сөздер енгізеді. Бұл баланың белсенді сөздік қорын қалыптастырады.

Қорытындылай келе, ойын — баланың тілін дамытуда аса маңызды құрал. Балабақшада ойын арқылы бала өз ойын еркін жеткізуді, әдеппен сөйлеуді, сөзді дұрыс қолдануды үйренеді. Сондықтан әр тәрбиеші тіл дамыту жұмыстарын ойынмен ұштастыруы тиіс.

ХОДОН ЗАМИШХАН

Павлодар облысы, Баянауыл ауданы

Майқайын кенті сабилер бақшасының тәрбиешісі.

Ересек «Балдырған» тобы