№54 «Айгүл» бөбекжай-бақшасы

Тақырыбы:“Сыбайлас жемқорлыққа қарсы тәрбие”

Ата-аналармен дөңгелек үстел:

Өткізгендер:Ересек топ тәрбиешілері

2025 оқу жылы

Тақырыбы:“Сыбайлас жемқорлыққа қарсы тәрбие”

Ата-аналармен дөңгелек үстел:

Мақсаты:Ата-аналарға сыбайлас жемқорлықтың қоғамға кері әсерін түсіндіру.Балабақша жастағы балалардың адалдық,әділдік,шыншылдық сияқты қасиеттерін дамытудағы отбасының рөлін талқылау.

Ата-аналармен бірлесіп,адалдық құндылықтарын қалыптастыру жолдарын қарастыру.

Кіріспе сөзі (тәрбиешінің іс-шараны ашуы)

Құрметті ата-аналар!

Бүгінгі дөңгелек үстеліміздің тақырыбы – «Сыбайлас жемқорлыққа қарсы тәрбие». Жемқорлықсыз қоғамды қалыптастыру – адалдық пен әділдікті бала жастан бойға сіңіруден басталады.

Тәрбиенің бастауы – отбасында. Балабақша мен отбасының бірлескен тәрбиесі ғана бала бойында шынайылық, әділдік, еңбексүйгіштік сияқты қасиеттерді қалыптастыра алады.

Осы қасиеттерді бірге талқылап, өз ойларымызды ортаға салайық!

Құрметті ата-аналар енді“Балабақшада және отбасында адалдықты тәрбиелеу” тақырыбында баяндаманы тыңдайық Ж.Бақытжанқызына береміз келесі сөз кезегін

Құрметті әріптестер, ата-аналар!

Адалдық – адамның ең маңызды қасиеттерінің бірі. Ол тұлғаның мінез-құлқын қалыптастырып, әділеттілікке, жауапкершілікке, шыншылдыққа үйретеді. Адалдықтың негізі баланың кішкентай кезінен қалыптасады. Сондықтан оны тәрбиелеуде отбасының да, балабақшаның да рөлі зор.

Негізгі бөлім:

Адалдық дегеніміз не?

Адалдық – бұл шыншылдық, әділдік, жауапкершілік және сенімділік. Бұл қасиеттер адамды сыйлы етеді және оның қоғамдағы орнын айқындайды.

Отбасында адалдықты қалай тәрбиелеуге болады?

1.Ата-ананың үлгісі: Бала ата-ананың іс-әрекетін қайталайды. Егер ата-ана шыншыл болса, бала да адал болады.

2.Ашық қарым-қатынас: Баламен шындықты айтуға, қателіктерді мойындауға үйрету.

3.Еңбекқорлықты дәріптеу: Баланы адал еңбек етуге баулу.

4.Әділеттілік пен жауапкершілікті түсіндіру: Баланың дұрыс пен бұрысты ажырата білуіне көмектесу.

5.Мадақтау және қолдау: Баланы шыншыл болғаны үшін марапаттау, өтірік айтудың салдарын түсіндіру.

Балабақшада адалдықты қалай қалыптастыруға болады?

1.Адалдық туралы ертегілер мен әңгімелер: Балаларға шыншылдық пен әділдіктің маңызын ертегілер арқылы түсіндіру.

2.Рөлдік ойындар: “Шыншыл бала”, “Өтірік пен шындық” сияқты ойындар арқылы балаларды адал болуға үйрету.

3.Жақсы мен жаманның айырмашылығын түсіндіру: Балаларға әділетсіздік пен өтіріктің салдарын мысалдар арқылы көрсету.

4. Балалардың өз қателігін түсінуіне мүмкіндік беру: Егер бала қате жасаса, оны жазалау емес, өз әрекетін талдауға үйрету.

5. Тәрбиешінің үлгісі: Тәрбиеші балаларға әділ, шыншыл болып, оларға үлгі көрсетуі керек.

Қорытынды:

Адалдық – адамның ең асыл қасиеттерінің бірі. Егер бала кішкентайынан адалдықтың маңызын түсінсе, болашақта әділ, жауапты, сенімді азамат болып өседі. Сондықтан адалдық тәрбиесі ең алдымен отбасында басталып, балабақшада жалғасуы керек. Біз бірге жұмыс жасасақ, балаларымызды шыншыл әрі әділетті етіп тәрбиелей аламыз.

«Ортақ ой бөлісейік» (Ата-ана пікірін тыңдау)

– Құрметті ата-аналар, баяндамадан көптеген маңызды ой түйдік. Енді сіздердің пікірлеріңізді тыңдағымыз келеді. Балаларға шыншылдық пен әділдікті қалыптастырудың қандай тиімді жолдары бар деп ойлайсыздар?

Баланың мінез-құлқы мен дүниетанымы ең алдымен отбасында қалыптасады. Сондықтан оның бойына шыншылдық пен әділдікті сіңіру – біздің басты міндетіміз. Мен ата-ана ретінде осы құндылықтарды тәрбиелеудің бірнеше маңызды жолын бөліскім келеді:

Баламен ашық қарым-қатынас орнату – бала өз ойын еркін жеткізіп, қателессе мойындауды үйренуі үшін, ата-анасы оны үнемі тыңдап, қолдау көрсетуі қажет.

Өзіміз үлгі болу – балалар айтқанымызды емес, жасағанымызды қайталайды. Егер біз шыншыл болсақ, олар да солай тәрбиеленеді.

Әділ шешім қабылдау – баланы жазалағанда немесе мадақтағанда әділ болу өте маңызды. Егер бала әділетсіздік көрсе, өзі де солай әрекет етуі мүмкін.

Еңбектің құндылығын түсіндіру – «Жеңіл жолмен жетістікке жету» деген түсініктен алыстатып, еңбектің жемісін өзі көруіне мүмкіндік беру керек.

Ертегілер мен өмірлік оқиғалар арқылы тәрбиелеу – шыншылдық пен әділдіктің маңызын балаға түсінікті тілмен жеткізу үшін ертегілер, әңгімелер, нақты оқиғаларды қолдануға болады.

Егер біз барлығымыз адалдық пен әділеттілікті күнделікті өмірімізде ұстансақ, балаларымыз да осы құндылықтарды бойына сіңіріп өседі. Бұл – олардың болашағы үшін ең үлкен инвестиция!

Рахмет!

“Адал бала – арлы бала!”Сыбайлас жемқорлықтың баланың психологиялық дамуына ықпалы

Сыбайлас жемқорлық – тек заң бұзушылық емес, сонымен қатар қоғамға, адамдардың санасына, әсіресе балалардың психологиялық дамуына теріс әсер ететін құбылыс.

Баланың әділеттілік сезімін бұзады

Балалар әділеттілікті өте жақсы сезінеді. Егер олар айналасындағы ересектердің заңсыз әрекеттерін, пара алуды немесе таныстық арқылы мәселені шешуді байқаса, бұл олардың санасына әсер етеді. Олар “адал еңбек маңызды емес, бәрін ақшамен немесе таныстар арқылы шешуге болады” деген қате түсінік қалыптастырады.

Адал еңбекке деген сенімін әлсіретеді

Егер бала ата-анасының немесе қоғамдағы адамдардың еңбексіз жетістікке жетіп жатқанын көрсе, ол адал еңбек етуге деген ынтасын жоғалтуы мүмкін. “Еңбек етудің қажеті жоқ, тек таныс адамдармен байланыс орнатсаң жеткілікті” деген ой қалыптасады. Бұл оның болашақтағы тұлғалық дамуына кері әсер етеді.

Өзіне деген сенімсіздік тудырады

Балалар өз күшіне сенуі керек. Бірақ егер олар “тек ақшаң болса ғана жетістікке жетуге болады” дегенді естіп өссе, өз мүмкіндіктеріне күмәндана бастайды. Олар өз білімдері мен қабілеттерін жетілдірудің орнына, “көмек керек” деп ойлайды.

Өтірікке, алдауға бейімдейді

Сыбайлас жемқорлық бар жерде шындық емес, өтірік жүреді. Егер бала ересектердің шындықты бұрмалап, әділетсіздікке жол беретінін көрсе, ол да өтірік айтуға, алдауға бейім болуы мүмкін.

Қоғамға деген сенімін төмендетеді

Бала кішкентай кезінен әділетті қоғамда өмір сүру керек. Бірақ егер ол әділетсіздікті жиі көрсе, “қоғам бәрібір әділетсіз” деп ойлап, айналасындағы адамдарға сенімсіздік танытады. Бұл оның психологиялық әл-ауқатына кері әсерін тигізеді.

Қорытынды:

Баланың санасы таза, ал оның болашағы біздің берген тәрбиемізге байланысты. Егер біз сыбайлас жемқорлықтың зиянын түсіндіріп, адалдыққа үйретсек, олар әділетті, шыншыл, еңбексүйгіш болып өседі. Балаларға адал еңбекпен жетістікке жетуге болатынын көрсету – біздің басты міндетіміз.

Видео ролик

«Шыншыл ата-ана» рөлдік ойыны

Мақсаты: Балаларға үлгі болу үшін ата-аналарға дұрыс шешім қабылдауды үйрету.

Өту барысы:

Ситуациялық сұрақтар беріледі, олар өз шешімін ұсынады.

Ситуациялар:

1.Балабақшада мерекелік іс-шараға ең белсенді ата-аналарға жүлде беріледі. Бір ата-ана өз жеңісі үшін қазылар алқасына сыйлық ұсынбақшы. Сіз не айтар едіңіз?

2.Сіздің балаңыз ойын кезінде досына жеңілдігі бар екенін айтып, оны өз пайдасына пайдаланбақшы. Сіз қалай әрекет етесіз?

3.Досыңыз сізден құжаттарды жылдам рәсімдеу үшін пара беру туралы кеңес сұрады. Сіз оған не дейсіз?

4.Егер балабақшада орын шектеулі болса, сіз өз балаңызды орналастыру үшін орналастырып беремдеушілерге сыйлық немесе ақша ұсынар ма едіңіз?

5.Балаңыз ойыншықты досынан сұрамай алып қойды. Сіз оны қайтаруға мәжбүрлейсіз бе, әлде көз жұма қарайсыз ба?

6.Жұмысқа орналасу үшін таныс адамға ақша беруге келісесіз бе?

7.Дүкенде артық ақша қайтарса, оны қайта беру арқылы адалдыққа үйрету.

Сыбайлас жемқорлыққа қарсы тәрбиелік әңгіменің жалғасын тап:

1. «Адалдық – ең үлкен мұра, өйткені…»

( …оны ешкім тартып ала алмайды, ол адамның ары мен намысын сақтайды.)

2. «Сыбайлас жемқорлық қоғамға зиян тигізеді, себебі…»

(…әділетсіздік күшейіп, адамдардың бір-біріне деген сенімі жоғалады.)

3. «Егер ата-ана адалдықты балаға үйретпесе, онда…»

(…бала өскенде парақорлықты қалыпты нәрсе деп қабылдауы мүмкін.)

4. «Жемқорлықтың алдын алу үшін әр адам…»

(…заңды сақтап, әділдік пен адалдық қағидаларын ұстануы керек.)

5. «Балабақшада және отбасында адалдыққа тәрбиелеу маңызды, өйткені…»

(…кішкентайынан дұрыс бағыт алған бала болашақта саналы азамат болып өседі.)

«Адалдық ағашы» ойыны

Қорытынды:

Құрметті ата-аналар!Бүгінгі дөңгелек үстелде адалдық пен әділдіктің бала тәрбиесіндегі маңызы туралы ой бөлістік. Баланың болашағы – біздің қолымызда. Сондықтан өзіміз адал болып, оларға дұрыс бағыт-бағдар беру – ең үлкен міндетіміз.

Адалдық – ардың ісі. Олай болса, балаларымызды шынайылыққа, әділдікке және жауапкершілікке тәрбиелейік!

Қатысқандарыңызға рақмет!