"Балалар әдебиетінің бәйтерегі"

Биыл 2024 жылы Республикалық "Бір ел-бір кітап" акциясы аясында жыл кітабы Қазақ балалар әдебиетінің классигі, әлем таныған жазушы, қазақ әдебиетін Хан Тәңіріндей биігіне көтерген қарымы бөлек қаламгер, ЮНЕСКО шеңберінде аталып өтілетін - Бердібек Соқпақбаевтың туғанына 100 жыл толуына арналған шығармалары көпшілік оқырмандарға оқуға ұсынылып отыр. Осыған орай Айнабұлақ ауылдық кітапханасында кітапхана оқырмандарының қатысуымен "Балалар әдебиетінің бәйтерегі" тақырыбында танымдық сағат өткізілді. Жазушының өмірі мен шығармашылығына тоқталып, жазушының кітаптары, qr коды бар аудио және электронды кітаптарынан көрме ұсынылып, бейне роликтер көрсетілді. Оқырмандар арасында "Тәтті әлде сұрақ" ойыны ойнатылып, жазушының өмірі мен шығармалары жайында сұрақтарға дұрыс жауап берген оқырмандарға шағын сыйлықтар табысталып, кеш соңында "Менің атым Қожа" киносы көрсетілді. Шара мақсаты: "Жақсының өзі өлсе де, сөзі өлмейді" демекші, балалардың сүйікті жазушысы, өзі өмір сүрген ортасының кезең келбетін көз алдыға келтіре кескіндеген, заманның шындығын жүрек сыздата суреттеген, сол бір күндердегі ел өмірін мөлдірете, жан жүректі елжірете мүсіндеген алғыр ойлы, қайсар мінезді, қайтпас рухты, шоқтығы биік тұлғаның еңбектерін оқырмандарға насихаттау.