«Балалар өкілінің белсенділігі – жарқын болашақ кепілі»

«Балалар өкілінің белсенділігі – жарқын болашақ кепілі»

Қазіргі қоғам белсенді, ізденімпаз және ұйымдастырушылық қабілеті жоғары жас көшбасшыларды талап етеді. Осындай заманауи талаптарға сай, өзінің озық ойымен, ерекше талантымен және іскерлігімен дараланып жүрген жас ұланның бірі – Әл-Фараби атындағы №21 мамандандырылған гимназиясының 8 «Г» сынып оқушысы Айжарыкова Жұлдыз.

Жұлдыздың көшбасшылық жолы «Жас ұлан» балалар мен жасөспірімдер ұйымының «Ұланбасы» сайлауынан басталды. Сайлау додасында өзінің мазмұнды, нақты және болашаққа бағытталған айқын бағдарламасын ұсынған ол, ең жоғары ұпай жинап, зор сеніммен «Ұланбасы» болып тағайындалды. Бұл тек жеңіс қана емес, үлкен жауапкершіліктің де бастауы еді.

Мектеп пен қала деңгейіндегі белсенділік

Бір жыл уақыт ішінде Жұлдыз мектеп қабырғасында ғана емес, қала деңгейінде де балалар өкілінің жұмысына жаңа леп әкелді, ұйым тынысын айтарлықтай жаңдандырды. Ол бір жыл бойы Қалалық оқушылар Сарайында тұрақты түрде өткізіліп тұратын «Ұланбасы» жиналыстары мен маңызды іс-шаралардың бел ортасында жүрді.

Жұлдыздың бойындағы ерекше қасиеттердің бірі – оның шешендік өнері мен сахна мәдениеті. Ол осы уақыт ішінде қалалық деңгейдегі барлық ауқымды шаралардың негізгі жүргізушісі болып, көпшіліктің ықыласына бөленді. Сахна төрінде өзін еркін ұстап, сөз қадірін түсінетін жас көшбасшы өзінің ұйымдастырушылық және зияткерлік әлеуетін толық дәлелдей білді.

«Көшбасшы болу – тек алда жүру емес, соңыңнан ерген ізбасарларына дұрыс бағыт-бағдар бере білу», – дейді Жұлдыздың өзі.

Еңбектің еленуі

Жыл бойы атқарылған қарқынды жұмыс пен қажырлы еңбек елеусіз қалған жоқ. Жыл қорытындысы бойынша Айжарыкова Жұлдыз белсенді шығармашылық қызметі, ұйымдастырушылық қабілеті және қала өміріне қосқан үлесі үшін арнайы Мадақтамамен марапатталды. Бұл марапат – Жұлдыздың еңбегіне берілген әділ баға және оның алдағы үлкен белестерге деген ұмтылысына жаңа серпін берген қуанышты сәт болды.

Болашаққа көзқарас

Әл-Фараби атындағы №21 мамандандырылған гимназиясы Жұлдыз сияқты дарынды да белсенді оқушысын мақтан тұтады. Мектеп қабырғасынан басталған бұл көшбасшылық жол Жұлдызды болашақта еліміздің дамуына елеулі үлес қосатын нағыз тұлға ретінде қалыптастыратыны сөзсіз. Қаланың бас жас ұланы – Жұлдызға тек сәттілік пен жаңа жеңістер тілейміз! Қанаттаныңыз, Жұлдыз, жұлдызыңыз әрдайым жарық болсын!