БАЛАЛЫҚ ЖАРАҚАТ ЖӘНЕ ТҰЛҒАНЫҢ ҚАЛЫПТАСУЫ

Қазіргі қоғамда «балалық жарақат» ұғымына байланысты түрлі пікірлер айтылады. Бірі оны адамның өміріндегі сәтсіздіктерге сылтау ретінде қабылдаса, енді бірі балалық шақтағы қиындықтардың адамның мінезіне, психологиялық жағдайына және болашағына тікелей әсер ететінін алға тартады. Әр адамның тағдыры әртүрлі, ал балалық шақта көрген мейірім мен қамқорлық оның болашақтағы тұлға болып қалыптасуына үлкен ықпал етеді.

Белгілі психолог Людмила Петрановская баланың өзін қауіпсіз сезінуі мен ата-ананың қолдауы оның өмір бойғы сенімділігінің негізі екенін айтады. Егер бала махаббат пен қамқорлықты сезініп өссе, ол қиындықтарды жеңуге де әлдеқайда бейім болады. Ал керісінше жағдайда, адам ұзақ уақыт бойы өткен өмірінің ауыр әсерінен арыла алмауы мүмкін.

Бұл пікірмен белгілі бір деңгейде келісуге болады. Алайда Ақберен Елгезектің «Болмаған балалық шақ» шығармасы бұл ойға басқа қырынан қарауға мүмкіндік береді. Себебі шығармадағы басты кейіпкер - автордың өзі. Ол балалық шағында мейірім мен жылулықты толық сезіне алмаса да, өмірдің қиындықтарына мойымай, өзін шыңдап, қазақ әдебиетінде өзіндік орны бар ақын әрі жазушы болып қалыптасты. Демек, қиын балалық шақ адамның тағдырын міндетті түрде күйретпейді. Керісінше, кейбір жандар үшін ол жігердің, төзімділіктің және үлкен жетістіктерге жетуге деген талпыныстың бастауы болуы мүмкін.

Бүгінде балаларға материалдық жағдай жасаумен қатар, олардың жан дүниесіне де көңіл бөлу өте маңызды. Кейде бір ауыз жылы сөз немесе ата-ананың қолдауы балаға ең қымбат сыйлық болуы мүмкін. Себебі бақытты балалық шақ - жарқын болашақтың кепілі!