Баланы тәрбиелеу-бұл болашақ өмірге дайындық

Баланы тәрбиелеу-бұл болашақ өмірге дайындық (Эссе)

Бала тәрбиесі - болашақтың күллі ұлттың тәрбиесі. Танымы бесіктен басталып, келешекке ұласатын балапандардың тәлім түбірі маңызды құндылық. Адамзат шыр етіп дүниеге келгеннен әлдиден, ән-күйден нұр алып, бойына құндылықтарды сіңіре бастайды. Осы тұста ата-анадан, ұстаздан, мектептен берілетін басты қажеттілік - тәрбие.

Баланы тәрбиелеу дегеніміз - келешек кілтін қалау, өмірлік келбетін қалыптастыру. Себебі, балалар – халқымыздың ертеңі, ұлтымыздың ұлы керуені, арманның адал көрінісі. Балаға тәлім-тәрбие беру дегеніміз - әуелі әдетті, мейірлі мінезді бойына дарыту ғана емес, болашақ өмірдің баянды болуына дайындау.

Өзім ұстаздық ұлы қызметтің қалыбын құйып жатқан соң, дара жолым дана жол болуы үшін барлық білім инвестициясын шәкірттерге құйғым келеді. Әрине білім бар жерде тәрбие болу міндетті. Осы орайда Әбу Насыр Әл-Фараби бабамыздың “Тәрбиесіз берілген білім - адамзаттың қас жауы” деген нақты нақылы еске түседі. Мен өзіндік жоспарымда шәкірттерді шабытты қылып шығару үшін танымдық қызығушылығын ояту, өмірде шартты һәм шынайы шешім қабылдауға, қиындықтардан қорықпай, оларға төтеп беруге үйрету секілді маңызды міндеттерді негіздеуге тырысамын. Бала тәрбиесіндегі зор һәм озық орын алатын құндылық бар. Ол ізгілік пен игілік, адамгершілік пен адалдық, құрмет пен жауапкершілік. Өз өміріне өзі жауапты екенін білген бала тарихи тұлға болып қалануына сеп болмақ. Ал білімді - ілімді балалар ғана биікке жетпек!

Өскелең ұрпақты тәрбиелеу дегеніміз құр үйдің талабы емес, қоғамның да ат салысар дүниесі көп. Біз үлкенге құрмет, сыйластық сынды қадірлі қасиеттерді бала бойына сіңірген сайын, өзін тік ұстап, еңселі елдің тұлғасы болу жолында барын салады. Болашақ өміріне дайындалады, адалдықтың кетігін қалап, арманға ұмтылады.

Дарабозы даланың,

Дарасындай қаланың.

Болашаққа маңызды,

Тәрбиесі баланың.

Тәлімі бар білінген,

Ізденетін ғылыммен,

Жарқын болмақ болашақ,

Тәрбие мен біліммен…

Иә расында осы жазған өлең жолдарым, бала құндылығын, бойындағы бақуаттылық пен алғырлықты білімге байлап қойғандай. Мен алдыма келіп, ақыл сұрап, болашаққа көш алған ұрпақты жетістікке жетелеу жолындамын.

Тоқсан ауыз сөздің тобықтай түйінін келтірсем, әр бала, әрбір өскелең ұрпақ , өрендер - білім және тәлімді болуға лайықты. Болашаққа қадам - танымды тәрбие, ұстамды тәлім, ұшқыр білімнен басталады. Ұрпағымыз ұлы, балаларымыз бақытты, білімді болғай!

Дайындаған: Ерғазеева Әсемгүл Аманжанқызы