Баланың уақыты қайда кетіп жатыр?

Бүгінгі бала бұрынғы баладан өзгеше. Себебі қазір бала күні бойы далада ойнап жүргеннен гөрі, телефон ұстап, әлеуметтік желіде отырғанды ұнатады. YouTube, TikTok, Instagram сияқты платформалар бос уақыттың негізгі бөлігін алып жатыр. Бір видео, бір ойын, бір сторис… Осылайша бір қарасаң, сағаттар өтіп кеткен.

Әрине, технология — уақыт талабы. Онсыз өмір сүру қиын. Бірақ технологияны дұрыс пайдалану маңызды. Көптеген бала телефон мен интернетке шектен тыс тәуелді болып барады. Бұл — тек көру қабілетіне ғана емес, ойлау қабілетіне, мінез-құлқына да әсер етеді.

Бұрын бала кітап оқып, сурет салып, достарымен ойнайтын. Ал қазір бұл әрекеттердің орнын гаджеттер басқан. Ең өкініштісі — бала өз уақытының бағасын білмейді. Жоғалтқан уақыт қайтып келмейді. Осыны ескерсек, әр бала өз уақытын пайдалы өткізуге тырысуы керек.

Себебі бүгін бос өткізілген уақыт — ертеңгі өкініш. Ал уақытына ие болған бала — болашағына да ие болады.