Балдәурен кеші көңілді

Балдәурен кеші көңілді

«Балдәурен» республикалық орталығында «Өнерлі өрге жүзер» сәндік қолданбалы және бейнелеу өнері фестивалі атты кезекті ауысым көктемнің шуақты күндерімен өз жұмысын бастап кетті.Ауысым тақырыбына сәйкес «Педагогикалық жастар тобы» мен ауысым шәкірттерінің атсалысуымен «Ауысымның ашылуы» салтанатты түрде аталып өтілді.Салтанатты кеш барысында арнайы дайындалған театрландырылған қойылым,патриоттық әндер және «Өзін-өзі басқару» ұйымының президентінің ант қабылдау рәсімі өтілді.

Оқушылар арасынан ең белсенді, көшбасшылық қабілеті бар шәкірттер «Жас патриоттар Академиясының» мүшелігіне қабылданатындығы туралы хабарлама жасалды.Орталықтың білім кешенінің директоры Б.Л.Жұмашев бармақтарынан бал тамған шеберлігімен осы ауысымға жолдама алып келген жас өрендерді ауысымның ашылуымен құттықтап,білімін жетілдіріп, шеберлігін шыңдап,балалықтың бал күндерін таза ауалы, жанға шипа дауалы, табиғаты таланттыға түрткі болатын, шабытының шарықтауына, тұлғалық келбетінің кемелденуіне септігі тиетін тамаша орында өткізулеріне шын жүректен тілегін білдірді.Қазақтың ұлттық мұрасы қол өнері,зергерлік,ұсталық шеберлік,сәндік қолданбалы өнер,тоқыма және гобилен,мүсін,кескіндеме сынды өнер түрлерін және олардың маңызы мен қазіргі таңда насихатталуы жайында сыр шертетін керемет сахналық көрініс арқылы оқушылардың ұлттық өнерге деген ықыласы артып, дүниетанымы тереңдеді.Салтанатты кеш ауысымға жиналған өрелі өнер иелерінің «Галаконцертіне» ұласты.

Нұржамал Тоқтағұлова “Балдәурен» республикалық оқу-сауықтыру орталығы филиалының қазақ тілі мен әдебиеті пәндерінің мұғалімі