Бақытты отбасының формуласы бар ма?

Бақыт деген не? Бақыт — бұл бір шаңырақ астында ата-анаңның шат күлкісімен әр таңды қарсы алу. Сол әрбір атқан таңыма алғысым шексіз. Үйімдегі жылылық, бір-бірімізге деген сыйластық — осының барлығы ата-анамның берген тәрбиесінен бастау алады.

Мысалы, әрбір отбасыға тән нағыз құндылықтар бар. Және сол құндылықтар — отбасыдағы бақыттың формуласы болып табылады. Бірі бар бақытты қадірлемей, менменшілдікке салынып, жақындарына деген сыйластық пен адамгершілікті бойына кіргізбейді. Ал кейбірі отбасын бірінші орынға қойып, әрдайым сол ыстық ұясына деген махаббатын әлемге паш етеді.

Ал енді, бақытты отбасының формуласына тоқталсақ:

1. Бірлікте өмір сүру.

Қандай қуанышты немесе қайғылы жағдай болмасын бірге қуанып, мұңды бірге жанымыздан өткізуіміз керек. Себебі отбасыдағы бірлік — қуанышта еселеніп, қайғыда жеңілдейді.

2. Сенім мен сыйластыққа негізделген тату-тәтті түсіністік.

Жалпы, барлық отбасыда түсіністік болса, бала да, ата-ана да бақытты. Егер отбасы мүшелерінің арасында берік байланыс болмаса, бұл үлкен мәселелерге алып келеді.

3. Қолдау.

Бірлікте өмір сүре отырып, бір-біріне еш көре алмаушылықсыз қолдау көрсете алған жандар — отбасы мүшелері. Ал қолдауды сезінген адам ешқашан жалғыз емес.

4. Ортақ құндылықтар.

Мысалы, менің отбасымда ең басты құндылық — біздің салт-дәстүрлеріміз және тіліміз. Отбасымызбен тарихымызды терең зерттеу — біздің ең сүйікті әдетіміз. Сол себепті әрбір жанұяда ортақ қызығушылықтар болса, ауызбіршілік те мықты болады.

5. Жауапкершілік.

Соңғы әрі нақты қадам. Біз бәріміз пендеміз және бұл өмірде біздің миссиямыз бар. Сол миссияның бірі — отбасымызда бақытты өмір сүру. Бұл міндетті толық орындау үшін бізге берілген жауапкершілікті сезіне білуіміз қажет. Әрине, бұл өте жауапты іс, бірақ жауапкершілікті қабылдау арқылы біз отбасының іргесін мықты ұстай аламыз.

6. Әрбір шаңырақта отбасы қағидасы болуы тиіс. Бейсен Құранбек ұстанған қағидаға сүйенсек, сыйластық + сенім + сабыр + махаббат + жауапкершілік + шүкіршілік + тұтастық = берекелі шаңырақ, өйткені ол әрдайым отбасы мүшелерінің бір-біріне адал болып, ешқашан ажырамай, әйел мен күйеу өз таңдауымен, балалар өз ата-анасымен ғана байланыста болу керегін айтып, осы қағидаларды өмірінде берік ұстанған абзал.

Бақытты отбасы болу оңай, ал оны ұстап тұру қиын. Сол үшін әрбір мүшесі бір-біріне құрмет пен түсіністікпен қарап, қуаныш пен мұңды бірге бөлісуі қажет. Күнделікті кішкентай істер мен жылы сөздер арқылы сенім мен сүйіспеншілік артып, отбасының бірлігі нығаяды. Тек осындай қамқорлық пен көңіл бөлу арқылы ғана шаңырақта жылулық сақталып, әр жүректе шынайы бақыт орнайды.

Ғалия Елубай