Баяндама

Тақырыбы: «Әлеуметтік педагогтің кәсіби құзіреттілігі: қазіргі білім беру жүйесіндегі жаңа талаптар»

Кіріспе

Қазіргі заманғы білім беру жүйесінде оқушы тұлғасының жан-жақты дамуына, оның құқықтарының сақталуына, әлеуметтік бейімделуіне ерекше назар аударылып келеді. Осы тұрғыдан алғанда, әлеуметтік педагогтің рөлі ерекше мәнге ие. Қоғамдағы әлеуметтік-экономикалық өзгерістер, отбасы құрылымындағы өзгерістер, ақпараттық кеңістіктің кеңеюі — балалар мен жастардың тәрбиесіне, олардың әлеуметтік жағдайына әсер етуде. Осыған байланысты әлеуметтік педагогтерге қойылатын кәсіби талаптар да күшейіп, құзіреттілік деңгейіне жаңаша көзқарас қалыптасты.

Негізгі бөлім

1. Әлеуметтік педагогтің кәсіби құзіреттілігі дегеніміз не?

Әлеуметтік педагогтің кәсіби құзіреттілігі – бұл оның білім, білік, дағды, жеке қасиеттер жиынтығы арқылы оқушылардың әлеуметтік мәселелерін шешуге, оларды қолдауға, бейімдеуге, қоршаған ортамен үйлесімді қарым-қатынас орнатуға бағытталған дайындық деңгейі.

Оған келесі құзыреттер кіреді:

1 Кәсіби білім – педагогика, психология, әлеуметтану, құқық негіздері;

2 Коммуникативті қабілет – балалармен, ата-аналармен, әріптестермен тиімді қарым-қатынас орнату;

3 Проблемаларды шешу құзыреттілігі – қиын жағдайдағы баланы анықтап, онымен жұмыс істеу;

4 Құқықтық сауаттылық – бала құқығын қорғау мен заңды негізде әрекет ету;

5 Этикалық-адамгершілік құндылықтар – эмпатия, шыдамдылық, төзімділік, мейірімділік.

2. Қазіргі білім беру жүйесінің жаңа талаптары

Білім беру жүйесінде жүргізіліп жатқан реформалар мен жаңартылған мазмұн әлеуметтік педагогтің де жұмыс бағытын өзгертуді талап етеді. Олар мыналар:

1 Жеке тұлғаға бағытталған тәсіл: Оқушының қызығушылықтарын, әлеуетін ескере отырып жеке даму бағдарламаларын жасау;

Әлеуметтік педагог әрбір оқушының жеке ерекшеліктерін, қызығушылықтарын, қажеттіліктерін ескере отырып, олармен жеке жұмыс істеуге қабілетті болуы қажет.

Эмпатия, коммуникативті дағдылар және психологиялық қолдау көрсету маңызды.

2 Инклюзивті білім беру: Ерекше қажеттілігі бар балалармен тиімді жұмыс жүргізе білу;

Бұл жағдайда арнайы педагогика, дефектология, және психология негіздерін білу — маңызды кәсіби құзіреттіліктердің бірі.

3 Цифрландыру: Ақпараттық технологияларды пайдалану, онлайн-платформалармен жұмыс істей алу;

Қазіргі заманда әлеуметтік педагог ақпараттық технологияларды пайдаланып, оқушылармен және ата-аналармен онлайн байланыс орнатуға дайын болуы керек.

Электронды құжат жүргізу, мәліметтер базасын құру, әлеуметтік желілерде қауіпсіздік мәселелерін бақылау – заманауи талаптар қатарында.

4 Қауіпсіздік пен құқық қорғау: Баланың қауіпсіз ортасында болуын қамтамасыз ету, зорлық-зомбылық пен буллингтің алдын алу;

Балалар құқығын қорғау, қиын жағдайдағы отбасылармен жұмыс жүргізу — әлеуметтік педагогтың маңызды міндеттері.

Құқықтық құзыреттілік: ҚР білім туралы заңы, балалардың құқықтарын қорғау туралы заңдарды меңгеру.

5 Әлеуметтік серіктестік: Жергілікті ұйымдармен, ата-аналармен, үкіметтік емес ұйымдармен тығыз жұмыс істеу.

Әлеуметтік педагог ұлтаралық, мәдениетаралық қарым-қатынаста түсіністік пен төзімділікті тәрбиелеуде делдал болуы тиіс.

Көпмәдениетті ортада жұмыс істей алу – маңызды кәсіби қабілет.

6. Жобалық және ұйымдастырушылық қабілеттер

Әлеуметтік-педагогикалық жобалар жасау, әлеуметтік акциялар мен шаралар ұйымдастыру, мектеп пен қоғам арасындағы байланысты нығайту

3. Әлеуметтік педагогтің кәсіби дамуы мен өзін-өзі жетілдіруі

Қазіргі талаптарға сәйкес, әлеуметтік педагог үнемі кәсіби біліктілігін арттырып, жаңашыл әдістерді меңгеріп отыруы тиіс. Ол үшін:

- Біліктілікті арттыру курстарына қатысу;

- Тәжірибе алмасу, кәсіби қауымдастықтарға мүше болу;

- Ғылыми-зерттеу жүргізу, әдістемелік материалдар дайындау;

- Жобалық және волонтерлік қызметтерге қатысу.

Қорытынды

Әлеуметтік педагогтың кәсіби дамуы оның жұмыс сапасына тікелей әсер етеді. Білікті, жан-жақты дамыған педагог балалар мен отбасыларға сапалы көмек көрсете алады. Сондықтан үздіксіз білім алу, жаңа әдістерді меңгеру және тәжірибені жетілдіру – әлеуметтік педагог мамандығының ажырамас бөлігі болып табылады.

Әлеуметтік педагог – тек қана әлеуметтік көмек көрсетуші маман емес, сонымен қатар оқушы тұлғасының жан-жақты дамуына, оның әлеуметтенуіне, өмірлік қиындықтарды жеңе білуіне көмектесетін кәсіби бағытталған маман. Қазіргі білім беру жүйесінің жаңа талаптары бұл мамандыққа жаңаша көзқараспен қарауды, құзіреттілік құрылымын жетілдіруді қажет етеді. Сондықтан әлеуметтік педагог өз кәсіби шеберлігін үздіксіз дамытып, қоғамның әлеуметтік сұранысына сай қызмет атқаруы тиіс.