Буллинг: мектептегі жасырын проблема

Қазіргі қоғамда мектеп тек білім беретін орын ғана емес, сонымен қатар тұлға қалыптасатын маңызды орта болып саналады. Бірақ осы ортада кейде көзге көрінбейтін, бірақ өте қауіпті мәселе – буллинг орын алады. Буллинг – бұл бір оқушының екінші оқушыға жүйелі түрде қысым көрсетуі, мазақ етуі немесе қорлауы.

Буллингтің бірнеше түрі бар. Оның ең кең тарағаны – физикалық буллинг. Физикалық буллинг дегеніміз - итеру, ұру немесе басқа да күш қолдану әрекеттері.

Сондай-ақ психологиялық буллинг те жиі кездеседі: мазақ ету, кемсіту, қорқыту, өсек тарату.

Қазіргі заманда кибербуллинг те өзекті болып отыр. Әлеуметтік желілер арқылы жасалатын қысым жасөспірімдерге одан да ауыр әсер етеді.

Буллингтің пайда болу себептері әртүрлі. Кейбір оқушылар өздерін күшті көрсету үшін әлсіздерді қорлайды. Кейде бұл үйдегі тәрбиемен, ата-ананың қарым-қатынасымен байланысты болуы мүмкін.

Ал кейбір балалар өздерінің ішкі қиындықтарын басқаларға агрессия арқылы шығарады.

Буллингтің салдары өте ауыр болуы мүмкін. Қысым көрген оқушы өзіне деген сенімін жоғалтып, сабаққа деген қызығушылығы төмендейді.

Кейбір жағдайларда ол тұйықталып, жалғыздықты сезінеді.

Сондықтан буллингті жай ғана «балалар арасындағы ұрыс» деп қарастыру үлкен қателік.

Бұл мәселены шешу үшін ең алдымен ашықтық қажет. Оқушылар өз мәселесін қорықпай айтуға мүмкіндік алуы тиіс.

Мұғалімдер мен ата-аналар балалардың мінез-құлқына мұқият қарап, өзгерістерді байқап отыруы керек.

Егер бала тұйықталып, мектепке барғысы келмей бастаса, бұл буллингтің белгісі болуы мүмкін.

Буллингтің алдын алуда достық пен қолдаудың рөлі ерекше. Егер сыныпта жылы атмосфера қалыптасса, мұндай жағдайлар сирек кездеседі.

Біреуді қорлағаннан гөрі, оған көмектесу әлдеқайда маңызды екенін балаларға үйрету қажет.

Қорытындылай келе, буллинг – мектептегі жасырын, бірақ өте қауіпті проблема. Оны елемеу болашақта үлкен қиындықтарға әкелуі мүмкін.

Сондықтан бұл мәселеге барлық қоғам болып назар аудару қажет. Әрбір бала өзін қауіпсіз әрі бағалы сезінетін ортада білім алуы тиіс.

Тек сонда ғана біз саналы, мейірімді және жауапкершілігі жоғары ұрпақ тәрбиелей аламыз.