Дене шынықтыру пәнінен эстафеталық ойындар 4-сынып

Автор: Әбілдаев Серікбай Арғынбайұлы

Қызылорда облысы Қызылорда қаласы №5 И.В.Панфилов атындағы мектеп-лицейдің

дене шынықтыру пәнінің мұғалімі

Дене шынықтыру пәнінен эстафеталық ойындар

4-сынып

Оқушылардың денсаулығын, ой өрісін, икемділігін, шапшаңдылығын арттыра отырып, салауатты өмірге тәрбиелеу мақсатында дене шынықтыру сабақтарында эстафеталық ойындар өткізуге болады. Ойын ысқырық, уақыт өлшегіш, әр түрлі таяқшалар,  баскетбол доптары мен  кедергілерді қолдана отырып, сыныпты топтарға бөліп жүргізіледі.

Кіріспе дайындық бөлімінде оқушыларды сапқа тұрғызып, сәлемдесіп болған соң саптағы жаттығулар (қыздырыну жаттығулары) орындалдады:

Оңға! Солға! Айнал! (Нұсқау: Оқушылардың дайындығына спорт киіміне көңіл бөлінеді және қауіпсіздік ережелерімен таныстырылады.)

1. Жүріспен орындалатын жаттығулар:

- қарқынды өзгерте отырып, кең адымдап жүру;

- қолмен және кеудемен қарапайым қимыл жасап жүру;

- қолмен аяқтың ұшынан ұстап отырып, төмен еңкейіп, аяқты тура ұстап жүру;

- қолды сермеп, алға қарай және бір жақ бүйірге қарай, кең адымдап жүру;

(Нұсқау: Басты, денені, қолды түзу ұстап жүрулерін қадағалау).

2. Жүгіруде орындалатын жаттығулар:

- Бір қалыпты баяу жүгіру;

- әр адымда секіре жүгіру (бір аяқпен секіру);

- артпен шегіншектей жүгіру;

- торға екі адым жасай жүгіру (ара қашықтық сақтау);

- қолды желкеге қойып, оң және сол бүйірмен жүгіру;

- қолды алдыға созып, тізені алақанға тигізіп жүгіру;

- алақанды артқа ұстап, өкшені артқа лақтыра жүгіру;

- жүріс пен демалысты қалпына келтіру.

(Нұсқау: Денені тік, қолдарын дұрыс қойып ұстауларын, дұрыс демалуын қадағалау).

Қыздырыну жаттығуларынан соң негізгі бөлімде сыныпты сапқа тұрғызып, саналу арқылы екі топқа бөлінеді. Ары қарай топ аралық эстафеталық ойындар жүргізіледі.

Қызықты эстафета

Әр топтан бір-бір оқушы ортаға шығады. Олар сол аяғын артына бүгіп, аяғының буынынан ұстап алады да, межелі жерге дейін сыңар аяқтап секіріп барады да, қайтарда жүгіріп жарысып келіп, саптың соңына тұрады, келесі бала ойынды жалғастырады.

«Сыңар аяқ» ойыны

Екі команда ойыншылары бір-бірден шығып, сыңар аяқпен шеңберден бірін-бірі итеріп шығару

Доппен жарыс

Бірінші бала екі баскетбол добын қолтығына қысып алып, межеге жүгіріп барады да, бір допты қалдырып, екінші допты келесі ойыншыға әкеліп береді. Келесі ойыншы бір доппен барып, екінші допты ала келеді. Ойын осылай жалғаса береді.

«Бір-бірінің үстінен секіру» ойыны

Сапта тұрған балалардың барлығы еңкейіп отырады да, соңғы бала олардың үстінен аттап секіріп, алдына келіп отыра қалады. Қалған ойыншылар да осылай жалғастырады. Қай топ межеге бірінші жетеді, сол топ жеңеді.

«Таяқща және секіртпемен секіру» ойыны

Бірінші ойыншы қолына таяқша алып, залдың ортасында жатқан секіртпеге дейін жүгіріп барып, таяқшаны қойп, секіртпемен секіріп, межені айналып сол жерге дейін келіп, секіртпені тастап, таяқшаны алып келесі балаға береді. Ойын осылай жалғаса береді.

«Кім жылдам» ойыны

Ойыншылар допты ұстап кедергілер арасымен жүгіріп, белгіленген межеге допты апарып қойып жүгіріп келеді, келесі ойыншы допты алып келеді т.с.с. ойын бастаушы допты алып келіп допты жоғары көтереді. (Нұсқау: Кедергілер арасымен жүгіру.)

Негізгі эстафеталық ойын

Бұл ойынға әр командадан үш ойыншыдан шығады. Залдың екі жағында тұрып, бір-бірден залды айналып жүгіріп, келесі ойыншыға таяқшаны береді. Қай команда этафетаны бұрын аяқтайды, сол команда жеңіске жетеді.

Қорытындыда эстафеталық ойындарға жақсы қатысқан оқушылар мадақталады.