Домбыра мен Димаш

Домбыра мен Димаш

Домбыра қазақ халқының ұлттық рухани қазынасы. Қазақ қазақ боп жаралғалы бері басынан не өтпеді. Сол кезде домбыра да халықпен бірге болып мұңын жырлады, қуанышын бөлісті. Мың өліп, мың тірілген қазақ қазір жаңа белеске көтерілді. Өз алдына тәуелсіз ел болды. Қара домбырамыз жаңа заманның күйлерін күмбірлете шалқытты. «Нағыз қазақ – қазақ емес, нағыз қазақ – домбыра» деп қара домбыраның қазақ халқына қаншалықты құнды екенін аса көрнекті ақын Қадыр Мырза Әли екі-ақ ауыз сөзбен жеткізген.

Сондай ұранмен домбыраның үнін күллі әлемге данқын танытып жүрген әншіміз Димаш Құдайбергенов. Бұл ХХI ғасырдағы қазақтың ән өнерінің биік шыңға шыққанының дәлелі. Ал бұған дейін қазақтың әнін әлемге танытқан Әміре Қашаубаев болды емес пе. Жалпы қазақтың ән өнерінің ауқымы кең. Себебі қазақ деген халық әншіл халық. Қазақ ән өнерінің алтын қорында есімдері сақталған талай сал-серілер, бұлбұл әншілер бар. Ешқандай ұлтта жоқ ешкімге ұқсамайтын күмбірлеген күйіміз өз алдына бір өнер. Осындай тамыры терең өнермен сусындаған Димаш Құдайберген миллиондаған тыңдарманның жүрегін ерекше даусымен елжіретіп қана емес, әр түрлі аспапта ойнай алатын талантымен де жаулап алды. Еліміздің мақтанышы домбыраны әлемдік сахнаға алғаш рет Қытайда өткен «I am Singer» сайысында алып шыққан еді. Сол кезде жас талант Құрманғазының «Адай» күйін нақышына келтіре тартып, халық аспаптарының сүйемелдеуімен халықтың «Дайдидау» әнін орындады. Қазақстан, Ұлыбритания, Ресей және Қытайда болған өзінің концертінде де жеке тұлға, патриот ретінде сахнаға киелі домбырасымен және ұлттық нақыштағы киімімен шықты. Сахнаны екпіні күшті күймен дүрілдетіп, көрерменді есінен тандырды. Домбыра мен Димаш бір арнаға түсіп үндесіп кете берді. Міне, сөйтіп Димаштың бойындағы егіз өнер әлемге бір-ақ күнде танылды. Одан кейін еліміздің бас қаласында болған жеке ән кешінде Димаш тыңдармандарды тағы да әсем әндерімен баурап алды. Әнші бауыры Әбілмансұрмен бірге атақты Құрманғазының «Адай» күйін халыққа арнап, үлкен қошеметке бөленді. Ал «баласы атқа мінсе, анасы тақымын қысар» дегендей, еліміз Димаштың әр қадамына сәттілік тілеп, назарында ұстады. Басқа елдерде Димаш жайлы тілшілер жарыса жазып жатты. Францияның мемлекеттік телеарнасы жас әнші Димаш Құдайбергеннің феноменіне толық репортаж жасады. Бұл репортаж Францияның әйгілі «Telematin» атты таңғы арнасында көрермендерге көрсетілді. Телеарна жүргізішілері Қытайдағы әлемдік шоуда еліміздің жиырма үш жасар әншісі ән айту шеберлігімен әлемге әйгілі болғаны жайлы айтқан болатын. Димаштың өнерін француз халқы таңдана да, сүйсіне де тамашалады. Таңғаларлығы Димаш қытай тілінде бір ауыз сөз айта алмайды, дегенмен әлемдік «Twitter» әлеуметтік желісінің қытай түріндегі нұсқасында «Weibo» әлеуметтік желісінде үш миллионнан астам оқырманы бар. Димаштың көрсетілімдері қытайлық әлеуметтік желілерде бір жарым миллиард қаралым жинады. Міне, қазақ мәдениетін жаңа белеске көтерген Димаш нағыз батырдың өзі. Димаш 2018 жылы қазан айында өзінің жеке ән кешін Лондонда өткізген болатын. Бірақ бұл кешті Қазақстанның Ұлыбритания Корольдігіндегі мәдениет күндері қарсаңында халыққа ұсынылды. Димаштың дауысына таңғалған ағылшын халқы Димаштың үш сағатқа созылған концертінде өте керемет сезімге батқанын жасырмады. Олар Димашқа «ғасырдың ең керемет дауысы» деген бағаларын жаудырды. Міне, Димаштың сыңғырлаған әуезді даусын әлем таңғала тыңдады. Қазақ елінің мәдениеті күй мен әнге бай. Осы еліміздің ұлттық нақыштағы әні мен күйін таныту Димаштай өнерлі жастардың қолында. Димаштың ән өнерінде жұлдыздай жарқырауына бүкіл қазақ жұртшылығы тілеулес.

Мақаланы жазған

«Арыстан» мамандандырылған

лицейінің мұғалімі

Шоранова Гульдария Ажикуловна