Дос іздеген Бота

Жумагалиева Айсана Умирована

№35« Шұғыла» бөбекжайының тәрбиешісі

БҚО,Орал қаласы

«Дос іздеген бота»

Мақсаты: Ертегі көрініс арқылы балаларды достық сезімге тәрбиелеу. Рөлдеріне еніп, оны іскерлікпен, үлкен шығармашылықпен орындауға тәрбиелеу; көркем сөздерді мәнерлеп орындауға бағыттау, жануарларға деген сүйіспеншілігін, қамқорлық сезімін қалыптастыру. Ертегіге деген қызығушылығын арттыру арқылы сахнада өзін - өзі еркін ұстауға қалыптастыру.

Айсана: Ерте, ерте, ертеде боталы түйе болыпты. Ол өзінің жібек жүнді сүйкімді баласына мейірімділікті, адалдықты үйретіпті. Мөлдір көзді бота өте ақылды болып өседі.

Бір күні анасы:

— Жұлдыз: Боташым, мен саған жақсы достан басқасының бәрін бердім. Енді тура өзің сияқты дос тап. Доссыз өмір қиын, әрі қызық емес, — дейді.
Бота: Бота, бота, ботамын

Бота атты қазақпын

Ақылдымын өзім,

Тостағандай көзім.

(Жайылып жүрген құлынды көріп)

— Бө - ө - ө, мен дос іздеп жүрмін, — деп бота боздайды.

Құлын: Мен құлыншақ, құлыншақ

Әрбір жерге ұрыншақ

Дос болсайшы ботажан

Мен сияқты құлынмен

— Иһ - һ - һі, кел, екеуміз дос болайық, — деп құлын кісінейді.

— Жоқ, сен сияқты дос емес, — дейді бота күлімдеп.

— Мүмкін бұзау болар, — деп құлын ботаны шығарып салады.

Бота бұзауға келіп:

Бұзау: Мен бұзаумын, бұзаумын

Шошаладан қорқамын

Сүзісуге батырмын

Жарысуға шорқақпын

— Бө - ө - ө, мен дос іздеп жүрмін, — деп бота боздайды.

— Мө - ө - ө, кел, екеуміз дос болайық — деп бұзау мөңірейді.

— Жоқ, сен сияқты дос емес, — дейді бота.

— Мүмкін қозы болар, — деп бұзау ботаны шығарып салады.

Бота қозыға келеді:

— Бө - ө - ө, мен дос іздеп жүрмін, — деп боздайды.

Қозы:- Мә - ә, мен қошақан қозымын

Момақанның өзімін.

— Мә - ә - ә, кел, екеуміз дос болайық — деп қозы маңырайды.

— Жоқ сен сияқты дос емес — дейді бота күлімдеп.

— Мүмкін күшік болар, — деп қозы ботаны шығарып салады.

Бота күшікке келіп:

— Бө - ө - ө, мен дос іздеп жүрмін, — деп боздайды.

Күшік: Гаф, гаф. Мен күшікпін саққұлақ

Үй күзетем шапқылап

Дыбыс шықса маңайдан Гаф, гаф деймін қаттырақ

Кел екеуміз дос болайық.

— Жоқ сен сияқты дос емес — дейді бота күлімдеп.

— Мүмкін мысық болар, — деп күшік ботаны шығарып салады.

Бота мысыққа келіп:

— Бө - ө - ө, мен дос іздеп жүрмін, — деп боздайды.

Мысық: Мяу-мяу, мен  кәдімгі  мысықпын,

Өзім  тым  пысықпын.

Бәрімен  дос  болып,

Пырылдаған  пысықпын, пыр-р,пыр-р.

— Мияу - мияу, кел, екеуміз дос болайық — деп мысық мияулайды.

— Жоқ, сен сияқты дос емес — дейді бота күлімдеп.

— Мүмкін әтеш болар, — деп мысық ботаны шығарып салады.

Бота әтешке келіп:

— Бө - ө - ө, мен дос іздеп жүрмін, — деп боздайды.

Әтеш: Ку-ка-ре-ку! Бұрап  қойған  сағаттай.

Айқайлаймын  таң  атпай.

Таңмен  ерте тұрамын,

Бәріңді  оятамын. Ку-ка-ре-ку!

Кел  екеуміз  дос  болайық.

— Ку - ка - ре - ку! Кел екеуміз дос болайық — деп әтеш айғайлайды.

— Жоқ, сен сияқты дос емес — дейді бота күлімдеп.

— Мүмкін бақа болар, — деп әтеш ботаны шығарып салады.

Бота бақаға келіп:

— Бө - ө - ө, мен дос іздеп жүрмін, — деп боздайды. 

Бақа: Бақа, бақа балпақ

Басым содан жалпақ

Жәндіктерді көп жедім

Жүз жасаймын мен деймін. Кел, екеуміз дос болайық, бақ - бақ.

— Жоқ, сен сияқты дос емес — дейді бота күлімдеп. 

— Мүмкін ара болар, — деп бақа ботаны шығарып салады.

Бота араға келіп:

— Бө - ө - ө, мен дос іздеп жүрмін, — деп боздайды.

Ара: З - з - з. Ұшып келсем қасыңа

Менен, сен шошыма

Сен тимесең, тимеймін

Қастығым жоқ, досыма з - з - з Кел, екеуміз дос болайық Гүл терейік, бал жинайық.

—З - з - з - зз, кел, екеуміз дос болайық — деп ара ызылдап қуа жөнеледі. Бота арадан зорға қашып құтылады. Басы салбырап, ерні салпиып бота өз анасына келеді.

Анасы: — Дос таптың ба, ботам? — деп сұрайды.

— Жоқ, анашым, сенбесеңіз көктегі күннен сұраңыз. Тура мен сияқты ешкім жоқ екен, — дейді.

Анасы жымиып:

— Өзің сияқты дегенім, адалдығыңды айтқаным, боташым. Досты жан тазалығымен таңдау керек, — дейді. Бота қуанып, адал достары: құлынды, бұзауды, қозыны, күшікті, мысықты, әтешті, қарғаны, бақаны ертіп келіпті. Ал, араны сабырсыздығы үшін қоспаған екен дейді.