Мектеп:

Ө.Жәнібеков атындағы №4 лицей - интернат

Тәрбиеші:

Әлішева Ғазиза

Күні: 20.12.2024ж.

Сынып : 4 – сынып.

Тәрбие сағатының тақырыбы

Дос және достық

Тәрбие сағатының мақсаты

Достық туралы жақсы пікір қалыптастыру.
Оқушылардың достық туралы ой-пікірлерін дамыту. Достықты қадірлей білуге тәрбиелеу, адал дос таба білуге баулу.

Достық, сыйластық туралы пікірлесе отырып оқушылар арасында сезім қалыптастыру.

Апта дәйексөзі:

«Бірлік болмай, тірлік болмас»

Құндылықтар

Бірлік және Ынтымақ.

Өзара сыйлыстық пен ынтымақтастықты көрсете отырып, өз көзқарастарын білдіре алу.

Көрнекілік

1. Қатысушылар: Арнайы шақырылған ата-аналар, қонақтар.

2. Мектеп ұстаздары мен оқушылар.

Тәрбие сағаттың барысы:

Жоспар:

І. Ұйымдастыру бөлімі.

ІІ. Негізгі бөлім.

ІІІ. Достық туралы өлең – шумақтар.

ІV. Интерактивті тақтада слайд көрсету.

V. Қорытынды

1-Жүргізуші: Армысыздар, құрметті ұстаздар және оқушылар!

«Дос және достық» атты бүгінгі тәрбие сағатымызды ашуға рұқсат етіңіздер.

Біз бүгін 4 сынып оқушылары арасында «Дос және достық» деген тақырыпта тәрбие сағатымызды ұйымдастырып отырмыз. Мақсатымыз кешегі шәкірттеріміз – бүгінгі студенттер мен бүгінгі шәкірттеріміз – ертеңгі студенттердің достық туралы ой пікірлерін білу, достықты қадірлей білуге шақыру, адал дос таба білуге баулу, яғни Мұса Жәлел айтқандай:

«Шын дос үшін қалайда

Тік қатерге басыңды.

Айыра біл алайда

Досың менен қасыңды». Сіздерді біз «достық» туралы тақырыпта сырласуға шақырамыз. Оқушылардың «достық» туралы өлең – шумақтарға кезек берсек.

1-оқушы. Айзере

Достығымыз достар арылмасын,

Пейілміз кеңейсін тарылмасын.

Жиі-жиі бас қосып сыр шерітсек

Жүрегіміз қалайша жарылмасын.

Күніміз күлкілі бола берсін,

Қуанышқа көңіліміз тола берсін.

Нұрлы аспан астында аясында,

Басымызға бақ келіп қона берсін.

Зұлымдықтан әрқашан жиренейік,

Адалдықты сүюді үйренейік.

Бірлікпенен тірлікті ұштастырып,

Бір әдемі ғажайып, күйге енейік

2-оқушы. Диас

Берсе берді, бермесе санаспайық,

Болмайтынға ұрысып таласпайық.

Арамызда алаяқ біреу болса,

Оны қатар ортадан аластайық.

Жасамайық қиянат кісі кетім,

Байлық – мансап кісіні ісіретін.

Қанағатсыз ағайын ойласаңдар,

Абыройын кісінің түсіретін.

3-оқушы. Ақбота

Дос болам десең,

Досыңды сыйла, қымбаттым!
Досыңды сонда,

Досыммен ғана қымбатпын.

Дос болам десең,

Мендегі доспен достасқын.

Сендегі доспен дос болып сонда тұрмақпын.

Достарың көп пе?

Апырау неткен жақсы едің?

4-оқушы. Керемет

Досым аз менің...

Досым – ау менің, тапшы емін?

Достарыңменен достартыр мені, асылым,

Достастыр мені?

Болайын құлың нақ сенің!

Достыққа жүрмін,

Достыққа жүрмін құмартып!

Өлгелі жүрмін,

Өзіме – өзім мін артып...

Жауыздың барып, жанына уәзір болғаннан,

Достардың барып, ауласында өлген мың артық.

5-оқушы.

Досым саған сенемін, сеніп өтем!

Жолы бөтен демеймін, жөні бөтен.

Достық деген – адамның көрігі екен,

Достық деген – ақылдың серігі екен.

Қыран күлкі – тамаша – бәрі осында,

Отырмын думан – тойдың арасында.

Береке бойдан асып жатқанымен,

Олқы тұр көңілім менің, нанасың ба?

2-Жүргізуші:

Ең әуелі «Достық туралы» ұлы ғұлама, ойшылдардың айтқан сөздерінен үзінділер келтірейік.

Қазақтың биі, әрі шешені Қазыбек би Келдібекұлы

«Адал болса – досың жақын,
Еркелейтін немерең жақын,
Өз ұрпағын шөберең жақын,
Туып өскен – елің жақын.»- дейді.

Достық адамның өмірдің өзіндей сан бояулы, көп қырлы қасиетті, сондықтан бірер сөзбен оның толық анықтамасын беру мүмкін емес. Әйтсе де, ұлы шешеннің жоғарыда келтірілген сөздерінде ұғымның басты мәндері көрегендікпен ашып көрсетілген.

Жақсы, енді достық туралы ойларыңызды білейік. Келесі кезекте «Шабыт» биін қабыл алыңыздар!

1. Жүргізуші:

Қандай адамдар досқа лайық?

Адамдар арасындағы достық сезімі өмірде олардың бірін - бірі қажетсінуінен, құрмет тұтынуынан, шынайы тілектестік пен өзіндей көріп сенуінен, бір - біріне тірек, медет болуынан, қам - қайғысыз кезде ғана емес, әсіресе, қиын - қыстау күндерінде іркілместен қасынан табылудан, риясыз, есепсіз жомарттықтан көрінеді. Абай армандағандай, сын сағатта «Мұнан менің қай жаным аяулы»,- деп, қасыңда бірге тұрып қана алатын адам ғана досқа лайық. Оқушылардың достық туралы мақал – мәтелдерге кезек берсек.

2-Жүргізуші:

Достық - әншейін дос тапқысы, дос болғысы келгендіктің нәтижесі емес. Бір - біріне пейілі – ықыласы түскен, жан жүрегі қалаған, көзқарасы мен ой - ниеті үйлескен, мінездері сиымды адамдар ғана дос бола алады. «Сенің досың кім екенін айт, мен сенің кім екеніңді айтып беремін» - деген екен ғой бір дана кісі жаңа танысқан адамына. Бұл ақылды сөздің мағынасы: достар жан дүниесі, ой өрісі, талғамы мен әлеуметтік көзқарасы жағынан жақын болады дегенге меңзейді.

Көрініс: «Екі дос».

1-Жүргізуші:

Дос – ақылшы, көмекші, сырлас, жақын, адал, шыншыл деген ұғымды береді. Достық әрбір адамның өміріндегі ең қызықты да, қимас та, қиын кезеңде қасыңда жүретін адамның саған деген адал мінезі. Адалдықсыз достық болмайды. Ал адалдық деген – рухани тазалық. Достық - адамдардың бір – бірін жаны қалап, жақын көріп, қалтқысыз сеніп, тілектес, мұраттас болуы.

Ендеше, оқушылардың достықтың жақсылық пен жамандық туралы өз ойларын тыңдасақ?

2-Жүргізуші:

  Дос дегеніміз - өмірдегі ең шыншыл, адал, қымбат жан. «Жаман дос көлеңке дейді» дана халқымыз. Демек, дос деп қиын сәтте арқа сүйей алатын, көмегін аямайтын, сырыңды басқа біреуге шашпайтын ізгілік иесін айтамыз.

1-Жүргізуші:

Қазақта: «Дұшпан күлдіріп айтар, дос жылатып айтар» деген мақал бар. Досыңның шындықты айтқанына байланысты сен мініңді, кемшілігінді түзейсің. Сондықтан өмірде, сөзіне берік, абзал дос таңдау өте маңызды және өзің де осындай жолдас бола білуің керек.

Келесі кезекте биші қыздарымыздың «Қамажай» биін қабыл алыңыздар!

2-Жүргізуші:

Достық - адамның бір - бірін жаны қалап, шын жақын көріп, қалтқысыз сеніп, тілектес болуы. Достық өмірдің ең зор қуаныштарының бірі - сырыңды айтатын, қуаныш - қайғыңды бөлісетін адамның болуы.

1-Жүргізуші:

Не жетеді нағыз досқа, асылға,
Қуанса да, қайғырсаң да қасында.
Қиналады, сен қиналсаң болғаны
Ұйықтамасаң - ұйықтамайды ол дағы,- деген сөздер достықтың ең биік шыңы екеніне дәлел.

Келесі өнерпазымыз Тәуірбаева Айдана мен Төлебекова Кереметтің орындауындағы «Менің досым» әнін қабыл алыңыздар!

Қорытынды:

1 – Жүргізуші:

Достық - адамдардың бір - бірін жаны қалап, шын жақын көріп, қалтқысыз сеніп, тілектес, мұраттас болуы. Достық туралы ұлы философтар мен ақын - жазушыларға қоса, ұстаздар мен педагог - психолог ғалымдардың ой толғамағаны, оның мәнін, сырын білуге талпынбаған адам кемде - кем. Мұның өзі достықтың адам өмірінде алатын келелі орнына, маңызына байланысты екені даусыз.

2 – Жүргізуші:

Ал, ғалым, ойшыл Аристотель былай деген екен: «Достық - өмір үшін ең қажетті нәрсе, өйткені ешкім ешқашан да игілікке түгел ие бола тұрса да, дос – жарансыз өмірді қаламақ емес». Осымен бүгінгі «Дос және достық» атты тәрбие сағатымызды аяқтаймыз!