Ертеңгілік "Құстарды аялайық"

Петропавл қаласы — 2018 - 2019 оқу жылы

Ертеңгілік «Құстарды аялайық».

Мақсаты: Балаларды жыл мезгілдерін ажырата білуге үйрету, көктем мезгілінің ерекшеліктеріне тоқталу. Құстар туралы жан – жақты түсінік беру, құстарды атап, бір – бірінен ажыратып, оларға қамқорлық жасауға үйрету.

Әдіс- тәсілдері: Таңғажайып сәт, музыка, сергіту сәті, би.

Керекті құрал жабдықтар: Үн таспа, күн, құстар (маскалармен).

І. Ұйымдастыру бөлімі.

Тәрбиеші: Балалар, қазір жылдың қай мезгілі?

Балалар: Көктем мезгілі.

Тәрбиеші: Көктемде ауа райы қандай болады?

Балалар: Күн жылынады, жаңбыр жауады, құстар ұшып келеді.

Тәрбиеші:Біз таңертең тұрып, далаға шыққанда аспаннан не көреміз?

Балалар: Аспаннан күнді, құстарды, бұлттарды көреміз?

Тәрбиеші: Ендеше балалар, бәріміз бірігіп «Көктем» әнін айтып көрейікші. (Ән)

ІІ. Ғажайып сәт.

Күн шапағын шашады. Күн болып бір қыз шығады. (Күн таудың арт жағынан шыққан іспеттес болып тұрады. Үн таспадан құстардың дауысы естіліп тұрады).

Күн: Ән құрадым үніммен, сән құрадым гүліммен.

Қуантамын бәріңді, құт береке күніммен.

Сәлем, елдің көктемі, әлем енді көктеді.

Құрметпенен бас идік, құстарыңа көктегі.

Тәрбиеші: Балалар, ерте көктемде ұшып келетін құстарды еске түсірейікші. Ол үшін сендерге жұмбақ жасырамын. (Құстарға байланысты жұмбақтар).

1. Шарлап келіп даланы,

Үйіме үйін салады. (Қарлығаш)

2. Су бетін сызып,

Ақ құман жүр сүзіп. (Аққу)

3. Кеудесі қайқаңдап,

Жүреді байпаңдап. (Қаз)

4. Екі айыр құйрығы,

Қияқ мұрт қанаты (Қарлығаш)

5. Тақылдатып мазаны ап,

Ағаштарды тазалап.

Ормандарды емдейді,

Зиянкесті тазалап. (Тоқылдақ)

Тәрбиеші:Жарайсыңдар, балалар! Өте жақсы! Жана сендер көктемде күн жылынады, құстар ұшып келеді, жаңбыр жауады дедіңдер.Құстар туралы кім қандай тақпақ біледі?

Тоқылдық: Тоқылдақпын, тоқылдақпын, ағаш қабығының зиянкестерін құртамын. Бір тәулікте 200 — дей зиянкестерді жұтамын, ағашты тазалайтын санитар —дәрігері боламын.

Қарлығаш:Қарлығашпын, мен Қарлығаш, мен адамның тұрағын,

Шыбын деген кеселден тазалап тұрамын.

Қараторғай: Мен — қараторғаймын, шегірткедей жұртыңды,

Егістікке түсетін қырғи болып қиямын.

Жәндіктерден зиянды қорғаушы боп тұрамын.

Бұлбұл: Мен бұлбұлмын, ән бұлағын тасытқан.

Тәрбиеші:Балалар, сендер құс туралы көп тақпақ біледі екенсіңдер. Енді, мен сендермен бір ойын ойнағым келіп тұр.

Ойын: «Ұшты —ұшты». (Ойын шарты түсіндіріледі)

Тәрбиеші: Бұл ойында қолдарын дұрыс көтермей қалған бала айыбын өтеп, тақпақ, жаңылтпаш, мақал — мәтел, жұмбақ, тыйым сөздер айтып береді. Ал, қане, ойнымызды бастайық.

— Ұшты, ұшты сұңқар ұшты! (қолды көтереді).

— Ұшты, ұшты тұлпар ұшты! (қол көтерілмейді).

—Ұшты, ұшты қарға ұшты (қолды көтереді).

Тәрбиеші:Балалар, енді бойымызды сергітіп алайық.

Сергіту сәті:

Аққу болып ұшамыз,

Көлге келіп қонамыз.

Көлдің бетін құшамыз,

Қайта самғап ұшамыз.

Тәрбиеші: Балалар, бізге тағы қонақтар келіпті. Осында кіргісі келіп рұқсат сұрап тұр. Кіргіземіз бе? Ал, қане, қанатты достар, кіре қойыңдар. (Аққу мен Көгершін ұшып ортаға келіп тоқтайды).

Тәрбиеші: Кім айтады осы екі құстың ішінде қайсысы бейбітшілік құсы? Әрине, ақ Көгершін.

Би: «Ақ Көгершін»

Тәрбиеші: Балалар, сендер қандай тыйым сөздер білесіңдер?

Балалар:

1. Құстың ұясын бұзба.

2. Құстардың жұмыртқасын жарма.

3. Аққуды атпа.

Тәрбиеші:

Қамқоршы боп жүреміз,

Табиғатқа, құстарға.

Аялаймыз оларды,

Жақсы көріп бәріміз.

Балалар, осымен «Аялайық құстарды» атты ертеңгілігіміз аяқталды. Бәріміз орнымыздан тұрып «Ақ көгершін» әнін айтайық.

Қоштасу: