Шалқар қаласы «№4 ЖОББМ» КММ
Досмуханова Аружан Берікқызы, 5 «Ә» сынып оқушысы
«Ардақты ұстазым» эссе
Ұстаз ұлы тұлға, ардақты жан. Ұстаз бейнесі адамгершіліктің ең жоғарғы үлгісі. Ұстаз жаны нәзік келеді. Шәкірттерінің ішкі ойын көзінен көріп, ісінен түсінеді. Осындай ұстаздардың бірі менің бастауыш сыныптағы апайым - Жанписова Шынар Мәртенқызы. Шынар апай біздің алғашқы ұстазымыз. Ең алғашқы әліппені оқытып жазуды, санауды үйреткен, біздің тәртіпті, тәрбиелі, білімді болып өсуімізге бар мейірімін төгіп, бар ынта – ықыласымен бізді сауаттандыруға бар күшін салды, білгенін үйретті. Біз бастауыш сыныпты аяқтап, 5 сыныпқа көшсек те Шынар апайымыз бізді ойлап, жақсы оқып биік шыңдардан көрінуімізді тілейді. Міне, осыдан білуге болады, ұстаздарымыздың біздің екінші анамыз екенін. Біз мұңайсақ жұбатқан, қуансақ бірге қуанған алғашқы ұстазымызды ешқашан ұмытпаймыз. Біздің қазіргі сынып жетекшіміз - Бисенбаева Гүлсана Сансызбаевна. Ол өте мейірімді, қарапайым жан, математика пәні мұғалімі. Гүлсана апай сабақты бар ынтасымен жақсы түсіндіріп, қызықты өткізеді, әр сабағын асыға күтеміз, себебі күнде бір қызықты есептер, логикалық тапсырмалар, сөзжұмбақтар, түрлі фигуралардан құралған есептер, шырпымен есептер шығару, т.б беріліп отырады. Маған апайымның сабақтары қатты ұнайды. Сонымен қатар, Гүлсана Сансызбаевна біздің тәртібімізді, сабағымызды күнде тексеріп отырады. Білмеген, түсінбеген жерлерімді түсіндіріп үнемі көмектеседі. Мен ұстазымды жақсы көремін. Ұстаз шәкіртін білім шыңына жетелейтін асқақ арманға жол ашатын ардақты жан. Шәкіртінің болашағын ойлайтын, өзінің бүкіл өмірін бала тәрбиесіне арнайтын аяулы жан, ардақты есім. Мен осы апайларымның сенімін ақтап, болашақта «дүниенің бір кірпіші» болып қаланғым келеді.