Эссе. "Исмайил Саттаров орта мектебі" КММ

Әлем өзгеруімен мен де өзгеремін

(эссе)

Біз – XXI ғасырда өмір сүріп барамыз. Бұл ғасыр – бәсекелестікке қабілетті, жаңашылдыққа бет бұрған білімділер ғасыры. Қоғам мен адамның жаңашылдыққа бейімделгені арқасында жаңа дәуір технологиялары тез дамып бара жатыр. Демек, әлем мен адам поездың екі рельісі сияқты тең дәрежеде жүріп жатыр.

Әлемдік тұрғыдан жалпы солай. Дегенменен, туған жеріміз – Қазақстан дербес Ел болғаннан кейін дара да, дана да Елбасымыздың саясаты арқасында жаңаша көзқарасқа ие игі жұмыстар атқарылды. Қазақстан халқы Ассамблеясы құрылып, ұлттар ара достық пен келісім нығайды. Қыстық Олимпиада өткізіліп, жаһандық спорт әлемімен қауыштық. ЭКСПО-2017 халықаралық көрме ұйымдастырылып, жаңа инновациялық технология дамыту аясында әлем көшімен тәжірибе алмастық. Бұның бәрі Еліміздің әлем көшімен бір қатарда жүріп келе жатқанының айғағы.

Мен де Қазақстанның бір азаматы. Ұрпақ тәрбиелеу жолында Үкіметіміз бекіткен Жаңартылған білім мазмұны бойынша қызмет етіп келемін. Жаңа оқыту процессі арқылы партада отырған білім алушыларды жаңашылдыққа, өз алдына жұмыс атқаруына ықпал еткізуге тырысып жүрмін. Осы орайды арнайы курстан өтіп, білімімді сабақтарымда шыңдап келемін.

Екіншіден, жеке шығармашылығыма ерекше мән беріп келемін. Ұйғыр тіліндегі өлеңдерім бүгінгі таңда қазақ және орыс тілдеріне аударылды. Қазақстан Республикасы Мәдениет және спорт министрлігі жанында құрылған Жас ақын-жазушылар кеңесінің мүшесі ретінде, жас қаламгерлердің шығармашылығын әлемдік аренаға шығару жолында үн қосып келемін. Жақында, Президентіміз Нұрұлтан Әбішұлы Назарбаев қатысқан «Жастар жылының» салтанатты жиынының ашылу салтанатында жоғарыда аталған кеңестің мүшесі, Семейлік ақын Мерей Қарт Қазақстанда Әдебиет академиясын құруды ұсынды. Ақынның айтуынша, Әдебиет академиясы құрылса, еліміздегі жас қаламгерлер әлемдік әдебиетпен тереңірек танысып, әдеби заңдылықтарға жоғары дәрежеде назар аударады. Сол кезде-ақ Қазақстан әдебиеті жаһандық аренада өз қолтамғасын қалдыратындай шығармаларды алып келетіне сенім білдірді.

Жоғарыда айтылғандай, мейлі қай салада болмасын, әлем көшінен қалмауымыз қажет. Қорыта айтқанда, «Әлем өзгеруімен мен де өзгеремін» деген ұстанымымыз өзгермесін.

(266 сөз)

Азнабакиев А.

қазақ тілі мен әдебиеті пәні мұғалімі.