Эссе тақырыбы: "Отбасы-шағын мемлекет"

Отбасым

Отбасы... Бұл сөзді естігенде көз алдымызға асқар тау әке мен асыл ана, оларға Тәңір сыйға берген ұлы махаббаттарының ең үлкен жетістігі, өмірлерін жалғастырушы, көздерінің нұры іспеттес перзенттерімен бірге сол сәттегі ашық аспан аясындағы бақытты өмірлері мен ынтымағы жарасқан қарым-қатынастары елестейді.

Әрбір пенденің Отанға деген ыстық сезімі отбасындағы бауырлары мен ата-анасына деген сүйіспеншілігі мен махаббатынан бастау алады.

«Әке – асқар тау,

Ана – етегіндегі бұлақ,

Бала – жасындағы құрақ» - деп дана халқымыз бекер айтпаса керек. Мағыналы сөз өлшемдерін өмірдің өзі дәлелдеп берді.

Менің отбасым – өмірдегі баға жетпес алтын қазынам. Анам – ақылшым, әкем – қамқоршым, ал бауырларым мен үшін әрқашан бәріне әзір жүріп, өмір сынақтарында маған қолдау көрсетіп, қуанышта да, қайғыда да жанымнан табылар асылдарым. Мен олармен мақтанамын. Алланың маған берген баға жетпес сыйының қадірін білемін.

Сөзімді қорытындылай келе, барша адамзат баласына бақытты отбасымен сүретін бақытты ғұмырды нәсіп етуін тілеймін.

Данабек Ақбота