Эссе. ТӘУЕЛСІЗДІК КЕПІЛІ – БІЛІМДІ ЖАСТАР!

ТӘУЕЛСІЗДІК КЕПІЛІ – БІЛІМДІ ЖАСТАР!

Көлеңке, күнгейі қатар өрбіген жаһандық кеңістікте жекелеген ұлттар өздерінің болмысын, мәдениетін және құндылықтарын еркіндігінің арқасында сақтап отырғандығы мәлім. Біздің де еліміздің ғасырлар бойы аңсаған Тәуелсіздігіне қол жеткізгендігіне, міне, биыл - 30 жыл! Бұл дата біздің еліміз үшін жай мереке емес, мәртебелі мерейтой. Өйткені отыз жылдықтың арғы жағында ата-бабаларымыздың қайтпас қайсарлығы мен өшпес ерлігі атойлап тұр. Тіпті, ел Президенті Қасым-Жомарт Кемелұлы Тоқаев «Тәуелсіздік бәрінен қымбат» атты мақаласында «Биыл қастерлі Тәуелсіздігімізге 30 жыл толады. Бұл –қайта жаңғырған қазақ мемлекеттігінің, ата-бабаларымыз аңсаған азаттықтың тұғыры нығая түскенін әйгілейтін маңызды белес. Тарих тұрғысынан алғанда, отыз жыл – көзді ашып жұмғандай қас-қағым сәт. Дегенмен, бұл көптеген халықтар үшін қиындығы мен қуанышы, дағдарысы мен дамуы алмасқан тұтас дәуір деуге болады. Біз де осындай жолдан өтіп келеміз», - деп атап өтті. Сол себепті біздей жас ұрпақтың санасында қастерлі Тәуелсіздігімізге деген құрметпен бірге, халқымыздың құндылықтарына деген адалдық, азаматтық борышымызға деген шынайылық үндесіп жатуы тиіс деген ойдамын. Меніңше, ол - заман талабына сай бәсекеге қабілетті, өз тарихын білетін, ұлттық бірегейлігіміздің баяндылығына себепкер ата-дәстүр мен әдет-ғұрыптарға қанық, озық ойлы азамат болып қалыптасу деген сөз.

Бабалар айтқан асыл сөз – бізге қашан да тұсбағар екені де белгілі. Түрлі езгілер мен жаншуларды көріп, халқымыз тығырыққа тірелген сәттерде де ұлт жанашырлары білімді қалқан тұтқан. Осы тұста Міржақып Дулатұлының мына сөзін тілге тиек ете аламыз: «Жалғыз сүйеніш, жалғыз үміт – оқуда. Теңдікке жетсек те, жұрттығымызды сақтасақ та, дүниеден сыбағалы орнымызды алсақ та, бір ғана оқудың арқасында аламыз. Жақсылыққа бастайтын жарық жұлдыз – оқу». Білім мен жақсы тәрбиені бойға сіңіру арқылы елдің гүлденуіне үлес қосуға болатындығын білген бабаларымыз білім мен мәдениет, жақсы тәрбие арқылы дербестікке қол жеткізе алатындығымызға сенген. Сондай-ақ, білім еркіндікті сақтап қалудың да – басты құралы екендігі белгілі. Сол себепті Тәуелсіз Қазақстанның келешегі – білімді жастардың қолында деп бек сеніммен айтуға болады. Сондықтан да мен де білекке сенген заманда ешкімге есе бермеген халқымыз білімге сенген заманда да қапы қалмауы тиіс деген ойдамын. Өйткені, біз үшін Тәуелсіздік қашан да қымбат!