№114 орта мектеп КММ

ЭССЕ

ЭССЕ тақырыбы:

Ұстаз-ұлылықтың, адалдықтың символы.

Информатика пәнінің мұғалімі : А. Конакбаева

Ұстаз-ұлылықтың, адалдықтың символы.

Ұстаз болу-жүректің батырлығы,

Ұстаз болу-сезімнің ақындығы,

Ұстаз болу-мінездердің күн шуағы,

Азбайтұғын адамның алтындығы-

деп ақын Ғ. Қайырбеков Ұстаздың ұлылығын осы төрт қатар өлең шумағына сыйдырып жырлаған. Иә, шынында да, Ұстаз-ұлы есім, ал адалдық пен адам бойындағы бар жақсылықтың ізгіліктің символы дер едім.

Шәкірт жүрегіне терең үңіліп, бала жанының бағбаны болып, шын жанашыр болу тек ұстазға ғана тән қасиет. Оның жүрек түкпірінде балаға деген риясыз, пәк сүйіспеншілік пен бауырмалдық жатыр. Білім мен тәрбиені қатар бала бойына сіңіремін деп аянбай тер төккен ұстаздың ерен еңбегі, әрине, өлшеусіз. Үлкен өмірге қадамын нық бассын деп, әр шәкірттің қоғамда бір нағыз тұлға болып қалыптасуына зор септігін тигізетін, даңғыл жолға адастырмай жетелейтін тек ұстаз десек болады.

Ұстаздық жол-ұлы жол. Бұл қиында қызығы қатар жүретін жолды тек шаршамайтын, қайсар, білімі терең, жүрегі адал адам ғана таңдайды деп ойлаймын. Ұстаз атына сай болу-үлкен мақсат. Жаңарған, жасарған қоғамда баланы оқыту мен тәрбиелеуде әр ұстаздан жаңашылдық пен жанашырлықты әр бала тәрбиесіне жауапты мұғалім ұғынуы тиіс.

Жаһандану дәуірінде қиялы ұшқыр, ұстанған мақсаты да биік шәкірттер талпынып өсіп келеді. Талапты да дарынды шәкірт тәрбиелеуде ұстазға қойылатын талап та жоғары. Сол деңгейде көріну үшін қазіргі таңда әр ұстаз үздіксіз білімін жетілдіруде. «Тәрбиесіз берілген білім-адамзаттың қас жауы» деп ұлы Әл-Фараби айтқандай, ізгілік пен адамгершіліктің дәнін шәкірт бойына себе отырып, білім беру-менің негізгі ұстанымым. Тәуелсіз еліміздің келешек тірегі болатын әр тұлға менің алдымда отыр деп сенемін. Ол үшін мен олардың алдымен адал, шыншыл, еңбексүйгіш, отансүйгіш болғанын қалаймын. Ал, шәкіртіңнең адал азамат болып қалыптасуына ұстаз үшін зор жауапкершілік жүктелетінін мен түсінемін.

Ұстаз ретінде ұлағатты ұстаздардың салып кеткен сара жолдарын жалғастырғым келеді. Қазіргі заман талабына сай озық ойлы, адал жүректі шәкірт тәрбиелеу үшін талапты өзімнен бастаймын десем де болады. Ұлылық пен адалдықтың символы-ұстаз атына нұқсан келтірмеу үшін тырысамын. Осы жолда аянбай еңбек етемін. Ізгіліктің нәрін себетін ұстаз мамандығының иесі болғанымды мен әрқашан мақтан етемін!