Авторы: Жылқыбай Рима Тілеуханқызы

Алматы облысы Еңбекшіқазақ ауданы Бәйдәбек би ауылы Т.Әубәкіров атындағы орта мектебі

Тарихы пәні мұғалімі

Тақырыбы :«Жаңа заман тарихы» пәніне арналған авторлық бағдарлама: инновациялық көзқарас және практикалық маңызы»

Мақсаты:

10-сынып оқушыларының ХХ ғасырдағы Қазақстанның саяси, әлеуметтік, экономикалық және мәдени дамуын терең, жүйелі және ғылыми негізде меңгеруін қамтамасыз ету; тарихи процестердің өзара байланысын талдай алатын, сыни ойлайтын, зерттей алатын, ұлттық құндылықтарды қадірлейтін және азаматтық жауапкершілігі жоғары тұлға қалыптастыру.

Жаңартылған білім беру жағдайында пәндерді оқытудың тиімді жолдарын табу – әрбір педагогтың басты мақсаты. Осы бағытта әзірленген «Жаңа заман тарихы» атты 10-сыныпқа арналған авторлық бағдарлама – Қазақстанның ХХ ғасырдағы саяси, әлеуметтік, экономикалық және мәдени даму жолдарын терең әрі жан-жақты зерттеуге бағытталған құнды оқу-әдістемелік еңбек.

Бағдарламаның негізгі ерекшелігі – тарихи фактілерді жай тізбектемей, олардың арасындағы себеп–салдар байланыстарын ашу, оқушының сыни ойлау, талдау және зерттеу дағдыларын дамыту. Оқыту үдерісінде хронологиялық симуляторлар, виртуалды экскурсиялар, тарихи карталар, дереккөздермен жұмыс, дебат, жобалық жұмыс, зерттеу жүргізу сияқты заманауи тәсілдер қолданылады.

34 сағаттық бағдарламада оқушылар:

Мемлекеттік Думадағы қазақ зиялыларының рөлін,

Ұлт-азаттық қозғалыстардың тарихи маңызын,

Алаш партиясының қызметін,

Кеңестік саясаттың салдарын,

Ашаршылық, қуғын-сүргін, лагерьлер жүйесінің әсерін,

Ұлы Отан соғысындағы Қазақстанның үлесін,

Ғылым, мәдениет, өнер салаларындағы дамуды,

Семей ядролық полигоны мен тың игеру кезеңінің салдарын,

Желтоқсан оқиғасының тарихи маңызын,

Тәуелсіз Қазақстанның қалыптасу кезеңдерін жан-жақты меңгереді.

Бағдарлама оқушылардың тарихи сауаттылығын арттырумен қатар, олардың азаматтық ұстанымын, ұлттық құндылықтарға деген құрметін қалыптастыруға бағытталған. Зерттеушілік бағыттағы тапсырмалар оқушылардың жеке көзқарасын дамытуға, тарихи оқиғаларға объективті баға беруге мүмкіндік береді.

Авторлық бағдарлама — Қазақстан тарихын терең әрі заманауи тәсілдермен оқытуға арналған нәтижелі құрал. Ол оқушыға тек білім беріп қана қоймай, оның тұлғалық дамуына, ғылыми-зерттеушілік дағдыларының қалыптасуына ықпал етеді.