«Жақсы кітап - жан азығы»

Кітап – бұл білім бұлағы, жол сілтеуші, тәлімгер және көмекші. Адам кітапты оқи отыра, өзіне қажетті білімді алып таным жиегін кеңейтеді. Ол әр адамға түрлі тұлғалар мен әр алуан әңгімелер, оқиғалар әлеміне апарар есік іспеттес.

Халқымызда: “Кітап – өмірдің ең алыс және қараңғы жолдарында жарық беретін шам” деген дөп айтылған нақыл бар.

Бүгінгі кезеңде кітаптың қағаз түрінен бөлек электронды нұсқалары да кеңінен қолданылады. Адам өз ыңғайына байланысты екі түрде де қызыққан кітаптарын оқи береді.

Алайда екеуінің айырмашылығы неде? Қағаз нұсқасы – бұл кітап беттерінде оқушы адамның жанына жаққан автордың ойлары, қанатты сөздері жазылған жолдарын белгілеп қойған жазбаларды байқауға болатын, қайта оқып, жақсы ойларды бекітуге ыңғайлы.

Электронды нұсқасы – цифрландыру кезеңінде оқуға болатын таптырмас ерекше дүние. Бүгінде электронды кітаптарды оқуға арналған құрылғылар бар. Олардың көптеген кітаптарды сақтайтын, қараңғыда оқуға арналған режимі сияқты айтарлықтай ерекшеліктері бар.

Сондай-ақ, ерекшеліктерімен қатар, мұндай құрылғыларды шектен тыс пайдалану адам денсаулығына тигізер зиянын ескерген жөн.

Кітаптар адамның жас ерекшелігіне байланысты сан алуан болады. Сол себептен, кітап оқуға деген құштарлықты бала кезден қалыптастыру керек екенін санғасырлық тәжірибе көрсетеді. Яғни, адамзат баласына ертегілер, қиссалар, батырлар жырынан бастап, есейе келе ілім-білімнің барлық салаларына бағытталған кітаптар оқытылады.

Кітап адамның бүкіл рухани құрамдас бөлігін шоғырландырады, оның білімі мен тәжірибесін жинақтап, таратады, әрі ақиқаттың, мейірімділіктің, адамзаттың ұсынушысы болды және солай болып қала береді. Кітаптан алынған білім адам өмірінің биіктеріне көтере алады. Кітап бізге адамдармен, халықтармен, ұрпақтармен байланыста болудың ең жақсы жолы екендігін уақыт көрсетті.

Кітап оқушысын тиісті дәуірге тасымалдай отырып, сол заманның орталық, ауқымды да, ең кішкентай компоненттерін де ашады.

Жалпы айтқанда, кітап – жарқыраған мысалдарға құрылған білім мен идеялардың, ойлардың, құнды кеңестердің қоймасы. Ол бізге өткеннің, болашақтың, сайып келгенде, қазіргінің жұмбақтарын ашады, шын мәнінде мағыналы, іргелі құндылықтарды қалыптастыра отырып, өмірді ретке келтіру мен тәртіпке, бейбітшілікте бірге өмір сүруге, басқаларды және өзімізді бағалауға, құрметтеуге және сүюге үйретеді.