Жасанды Интеллект (ЖИ) және Болашақ: Мүмкіндіктер мен Сын-тегеуріндер

Жасанды интеллект (ЖИ) – адамның ойлау, талдау және іс-әрекет ету қабілеттерін компьютерлік жүйелерде бейнелейтін озық технология. Бүгінгі таңда ЖИ адамзат қызметінің барлық салаларында, оның ішінде экономика, медицина, қауіпсіздік және білім беру жүйелеріндегі жұмысты айтарлықтай жеңілдетіп, тиімділігін арттыруға бағытталған.

Қазақстанның дамуы үшін ЖИ маңызды. Елбасымыздың: "Бұл технология әлемдегі барлық елдің дамуына тікелей әсер етуде. Қазір онсыз жаһандық бәсекеге төтеп беру мүмкін емес" деген пікірі осыны айғақтайды. Мемлекет басшысы ЖИ-ді барлық саланың қозғаушы күші, еліміздің инновациялық дамуының және цифрлық дербестігінің тірегі деп санайды. Бұл бағыттағы іс-шаралар мемлекет болашағы үшін жарқын мүмкіндіктерге жол ашады. Мысалы, ІІМ орынбасары Сәкен Сәрсенов атап өткендей, ЖИ арқылы жұмыс істейтін 19 мың ақылды камера қылмыстардың алдын алуға және оларды жедел ашуға сеп болып, қоғамдық қауіпсіздікті күшейтудің маңызды құралы болып отыр. (Smartnews.kz дерегі бойынша, ЖИ көмегімен іздеудегі 285 адам ұсталған).

Білім берудегі ЖИ: Екіұшты Мүмкіндік

Жасанды интеллект оқушылар мен студенттер үшін де үлкен жеңілдік әкелді, ол – тапсырмаларды орындауға арналған тиімді құрал. ЖИ күрделі жұмыстарды жылдам әрі оңай орындауға, оқушылардың бас қатырмай-ақ берілген материалдарды жеңіл меңгеруге үлкен үлес қосуда.

Алайда, осы жеңілдік өскінші мамандардың болашағына қауіп төндіруі мүмкін.

Жастар ЖИ-ді тек қосымша көмекші құрал ретінде ғана емес, негізгі ақпарат және дайын шешім көзі ретінде де қолданып жүргені анық. Болашақ маман иесі үшін өз саласының барлық қырларын танып-білу, шығармашылық тұрғыдан ойлау және мәселелерді өз бетімен шешу дағдылары дәл осы жүйелі тапсырмаларды орындаудан басталады.

Сондықтан, ЖИ көмегіне сүйеніп, тапсырмаларды толықтай автоматтандыру қаншалықты дұрыс?

Егер ЖИ-ді негізгі жұмыс барысында үнемі және шектеусіз қолдану оқушылардың терең талдау жасау, сыни тұрғыдан ойлау және еңбекқорлық дағдыларын қалыптастыруына кедергі келтірсе, онда біз біліктілік дағдарысына тап болуымыз мүмкін. Ұлт болашағының жарқын кепілі – бүгінгі жастар. Олардың саналы, білікті маман болып қалыптасуы үшін ЖИ-ді қалай қолдану керектігін анықтайтын арнайы ережелер мен шектеулердің болғаны жөн.

Жасанды интеллект – мемлекетіміздің дамуына, инновациялық жетістіктерге және қоғамдық қауіпсіздікке кепіл болатын заманауи құрал. Алайда, оның білім беру саласындағы қолданылуын реттеу және оқушыларды ЖИ-ге толық сүйеніп қалудан сақтандыру – ұлт болашағының жарқындығына кепілдік берудің маңызды шарты. ЖИ-ді пайдаланудағы тепе-теңдікті сақтау – болашақ мамандардың технологиялық прогрессті тиімді пайдалана отырып, өздерінің дағдылары мен білімін тереңдетуіне мүмкіндік береді.

https://qazaqtime.com/article/85732 (қосымша ақпараттар алынған сілтемесі)

Қайырғалиқызы Іңкәрайым

Мектеп-Лицейдің 11сынып оқушысы