Кім шындық айтады: журналист пе, блогер ме?

Кім шындық айтады: журналист пе, блогер ме?

«Бәрі блогер, бәрі журналист!» деп мақтанатын заманда шындықтың жүзіне кім шырақ жағар екен? Күні кеше ғана шындықты шырқыратып жеткізетін кәсіби журналистер халықтың үні еді. Ал бүгінде TikTok-тағы влогер, Instagram-дағы блогер кім көрінген ақпарат таратып, «журналист» рөлін ойнап жүр. Бірақ «жаңалықты кім тез жеткізеді» деген жарыста шындықтың жүзіне шаң жұғып жатқан жоқ па? Журналистика – халық пен билік арасындағы алтын көпір. Ол – тек ақпарат тарату емес, халықтың жанайқайын жеткізу, биліктің әрекетін бақылау, әділетсіздікті әшкерелеу. Бірақ қазір журналистика фейк пен хайптың тасасында қалып барады. Жылдамдыққа ұмтылған көп контенттің сапасы сын көтермей, сенімсіз ақпараттың тасқыны халықты шатастырып жіберді. Қазақстанда да журналист болам деген жастар көбейді. Олар газет, радио, телеарнада ғана емес, TikTok пен Instagram-да да өз ойларын еркін жеткізуді үйреніп алды. Бұл, әрине, заманауи тренд. Бірақ кәсіби журналистиканың басты құндылығы – факті мен жауапкершілік екенін ұмытпауымыз керек. Журналист тек «хайп» қуып, көрілім жинаумен шектелмеуі тиіс. Ол халыққа ақиқат жеткізуші, шындықтың жаршысы. Кәсіби журналистік әдеп, фактчекинг, екіжақты пікір алу – нағыз журналистің қаруы. Әйтпесе, фейк ақпараттың құрбаны болу оп-оңай. Ал фейк ақпарат халықтың сенімін жоғалтып, ел ішіне іріткі салуы мүмкін. Ендеше, әлеуметтік желі дәуірінде де кәсіби журналистиканың рөлі әлсіреген жоқ. Керісінше, шындықты айту – бұрынғыдан да маңызды міндетке айналды. Ақпарат майданында журналистика халықтың қорғаны, әділеттің күзетшісі болып қала беруі тиіс.

Улухманова Ақжан Бақытжанқызы

Жамбыл облысы, Тұрар Рысқұлов ауданы, Құлан ауылы

11 сынып