Түркістан облысының білім басқармасының

«Д.Қонаев атындағы аграрлық техникалық колледжі»МКҚК

"Кітап – білім бұлағы, білім – өмір шырағы"

тәрбие сағаты

Қатысқандар: Колледж студенттері

Орындаған: Кітапхана меңгерушысы Б.Раимкулова

Қарабұлақ-2025ж

Тәрбие сағатының тақырыбы:

"Кітап – білім бұлағы, білім – өмір шырағы"

Мақсаты:

• Оқушылардың кітапқа деген сүйіспеншілігін арттыру;

• Кітаптың құндылығын түсіндіріп, білімге деген қызығушылығын ояту, кітап оқу мәдениетін дамыту.

• Кітап оқу арқылы олардың сөздік қорын , ой — өрісінің дамуын арттыру.

• Білімнің адам өміріндегі рөлін ұғындыру және оның болашаққа ашатын мүмкіндіктерін түсіндіру.

Кітапханашы:

Құрметті студенттер және шараға қатысушылар! Бүгінгі тәрбие сағатымыздың тақырыбы – "Кітап – білім бұлағы, білім – өмір шырағы". Бұл тақырып кездейсоқ таңдалмаған, өйткені кітап – адамзаттың ғасырлар бойы жинақтаған рухани және мәдени қазынасы, білімнің сарқылмас бұлағы.

Абай, Мұхтар қазағымның қаймағы,

Әсем жырмен өрнектелген ойлары,

Бес нәрседен қашық бол деп тәрбиелер,

Жат қылықты жақтырмайды бойдағы – дей келе бүгін сіздер мен кітап оқудың маңыздылығы, білімнің адам өміріндегі рөлі және оның болашаққа ашатын мүмкіндіктері туралы пікірлесетін боламыз.

1. Білім мен кітаптың маңыздылығы

Білім – адам өміріндегі ең асыл құндылықтардың бірі. Ол адамға ой-өрісін кеңейтуге, өзін жетілдіруге, болашаққа сенімді қадам басуға мүмкіндік береді. Білім арқылы адам ақиқат пен жалғанды, пайдалы мен пайдасызды айыра алады, өз ортасында орнын табады. Әлемдегі түрлі жетістіктер мен жаңалықтардың негізі де білімнен бастау алған. Білімді адам әрқашан жоғары бағаланып, құрметке ие болады, себебі ол өзінің және қоғамының игілігі үшін маңызды істер атқара алады.Ал кітап – білімнің негізгі көзі. Ол ғасырлар бойы жинақталған даналық пен тәжірибені, ғылымның сырларын келесі ұрпаққа жеткізеді. Кітап оқу арқылы біз әр түрлі мәдениеттермен танысамыз, жаңа білім аламыз және өзімізді жан-жақты дамытуға мүмкіндік аламыз. Кітап адамды адамгершілікке, ізгілікке, сабырлы және ақылды болуға баулиды. Ой-сананы кеңейтіп, өмірді тереңірек түсінуге жетелейді.

Кітапты жиі оқитын адам өзіне жаңа ойлар, түрлі идеялар табады, бұл оның шығармашылық қабілетін шыңдайды. Кітап бізге өмірлік сабақ беріп, қоғамда өз орнымызды табуға көмектеседі. "Кітап – білім бұлағы, білім – өмір шырағы" дегендей, кітап арқылы адам өзінің ішкі жан дүниесін байытып, білімі арқылы әлемге жарық шашады.

Білім мен кітап бір-бірімен тығыз байланысты. Білім іздеген адам міндетті түрде кітапқа жүгінеді, ал кітап оқыған адам міндетті түрде білім алады. Сондықтан,

білімге, оқуға ұмтылған әрбір адам кітапты өмірінің бір бөлшегіне айналдыруы

тиіс. Кітап – адамзаттың ең құнды мұрасы, шексіз білім қазынасы.

2. Сұрақтар

Құрметті студенттер, бүгінгі тәрбие сағатында сіздерге тақырыбымызға байланысты бірнеше сұрақтар қояйын деп отырмын. Бұл сұрақтар арқылы кітап және білім туралы ой-пікірлеріңізді, түсінігіңізді біле аламыз.

Әрқайсыңыз белсенділік танытып, өз ойларыңызды ашық айтсаңыздар.

Әр сұраққа жауап беру арқылы кітапқа деген көзқарасыңызды көрсетіп, біліміңізбен бөлісе аласыздар. Сонымен, алғашқы сұрағым:

• "Сіз үшін кітап деген не? Ол сіздің өміріңізде қандай рөл атқарады?"

• "Қазіргі уақытта кітап оқу мен білім алудың маңыздылығы туралы не ойлайсыздар?"

• "Сізге ерекше әсер еткен кітап бар ма? Ол қандай және неліктен ерекше?"

• "Кітап оқуды өзіңізге әдетке айналдыру үшін қандай қадамдар жасайсыз?"

• Кітап не үшін "білім бұлағы" деп аталады?

• Оқыған кітабыңыздың немесе сүйікті авторыңыздың есіңізде қалған маңызды ойларын айтып беріңіз.

• Білім адам өмірін қалай жарық етеді деп ойлайсыз?

• Қазіргі технология дамыған заманда кітаптың орны қандай? Электронды кітаптар мен баспа кітаптардың айырмашылығы қандай?

• Білімге жетелейтін және сізге шабыт берген кітап бар ма? Ол қандай кітап?

• Кітап оқуды күнделікті дағдыға айналдыру үшін не істеуге болады деп ойлайсыз?

• Қазақ әдебиетінің немесе әлем әдебиетінің қай шығармасын барлық адам оқуы керек деп санайсыз? Неліктен?

• Кітап оқуға деген сүйіспеншілікті арттыру үшін мектептер мен колледждерде қандай шаралар ұйымдастыру керек деп ойлайсыз?

3. Тақырыпқа байланысты нақыл сөздер мен мақал-мәтелдер:

«Жалғастыр» ойыны.

Құрметті студенттер және қонақтар! Бүгінгі тәрбие сағатымызды жандандыру үшін қызықты ойын ұйымдастырғалы отырмыз. Бұл ойын – "Жалғастыр" деп аталады.

Ойынның мақсаты – кітап, білім, оқу туралы нақыл сөздер мен мақал-мәтелдерді еске түсіріп, олардың жалғасын табу арқылы білімдеріңізді сынау. Мен сіздерге бір мақалдың немесе нақыл сөздің басын айтамын, ал сіздер оның жалғасын табуға тырысасыздар. Мысалы, мен "Білекті бірді жығады…" десем, сіздер "...білімді мыңды жығады" деп жалғастырасыздар.

Бұл ойын арқылы біз мақал-мәтелдер арқылы кітаптың, білімнің қадірін тағы бір рет ұғына түсеміз. Сонымен, барлығыңызға сәттілік тілеймін! Ойынды бастаймыз!

1. Білім – ... сарқылмас байлық.

2. Оқу – білім бұлағы, ... білім – өмір шырағы.

3. Кітап – ақылдың ... құралы.

4. Білекті бірді жығады, ... білімді мыңды жығады.

5. Көп оқыған біледі, ... көп тоқыған түсінеді.

6. Ғылым – теңіз, ... білім – қайық.

7. Оқыған озар, ... оқымаған тозар.

8. Білім азбайды, ... ақыл тозбайды.

9. Білімдіден шыққан сөз, ... талаптыға болсын кез.

10. Оқусыз білім жоқ, ... білімсіз күнің жоқ.

11. Оқусыз өткен өмір – ... суы жоқ өзенмен тең.

12. Біліммен жарқырар басың, ... білімсіз сарғайып қалар жасың.

13. Көп оқыған – көзі ашық,... көп тыңдаған – құлағы ашық.

14. Білімдіге дүние жарық, ... ілімсіздің күні қаріп.

4. Кітапқа арналған көрме.

Құрметті оқырмандар! Бүгін біз сіздерге арнап кітапқа арналған арнайы көрме ұйымдастырдық. Бұл көрменің мақсаты – сіздерді кітап әлемінің сан алуан қазынасымен таныстыру, әр кітаптың терең мәні мен құндылығын сезіндіру.

Әрбір кітап өзіне тән тақырыбы мен идеясы арқылы ерекшеленеді. Әр кітапта өзіндік бір сыр, бір әлем, бір құндылық бар. Біздің кітапханамыздың сөрелерінде әр түрлі жанрдағы, әр түрлі бағыттағы кітаптар орналасқан: біреулері адамды өткен дәуірлерге жетелесе, басқалары болашаққа үміт пен арман сыйлайды. Міне, осы кітаптардың әрқайсысы – өз алдына бір өмір сабағы, рухани азық.

Әр кітап – оқырман үшін жаңа таным, жаңа ашылу, және өзіндік ізденіс көзі.

Кітаптар арқылы біз өмірімізді жақсартатын идеялар мен құндылықтарды табамыз, ой-өрісімізді кеңейтеміз, өмірге деген көзқарасымызды тереңдете түсеміз. Кітапханаға келген әрбір оқырман өзіне қажетті, өз жүрегіне жақын кітап табады деп сенемін.

Қорытынды

Құрметті студенттер, бүгінгі тәрбие сағатына қатысып, білімге, кітапқа деген қызығушылық танытқандарыңыз үшін алғысымды білдіремін. Кітап – біздің рухани азығымыз, жан дүниемізді байытатын, ой-өрісімізді кеңейтетін, өмірімізді жарық ететін білім бұлағы. Оқуға деген талпыныстарыңыз, білімге деген құштарлықтарыңыз сіздерді алдағы өмір жолында табысты, жан-жақты тұлға болуға жетелейді.

Есіңізде болсын, кітап оқыған адам – ешқашан жаман жолға түспейді, әрқашан ізгілікті, парасатты жолда жүреді. Осы бағытта білім алуға, кітап оқуды күнделікті өміріңізге серік етуге шақырамын. Сіздерге тек сәттілік, талмай ізденіс және білімге деген шексіз құштарлық тілеймін!