Креативті ұрпақты тәрбиелеп оқыту маңызды мәселелердің бірі.

Креативті ұрпақты тәрбиелеп оқыту маңызды мәселелердің бірі.

Мектеп оқушыларының оқу іс-әрекеті мен оқудан тыс уақытындағы іс-әрекетінде белсенділік қабілетін дамыту өскелең буынға тәлім-тәрбие берудегі күрделі психологиялық әрекет болып табылады. Қабілеттің дамуы оқушылардың интеллектісін дамытумен байланысты екендігін негізге ала отырып, оқу үдерісін тиімді ұйымдастырудың, іс-әрекет субъектісінің сапалық ерекшеліктерінің, сабақ кезінде және сабақтан тыс оқу-тәрбие шаралары кездерінде диагностикалық тапсырмаларды ұтымды қолданудың мәні зор.

Қазіргі кезде мектептердегі білім мен тәрбие беру жүйесінен дағдарыс кезеңдерін көруге болады. Мұның мәні – мектеп өмірінде жаңаша талаптарға сай педагогикалық үдерісті басқаша ұйымдастыруға толық көшпеу. Бүгінгі күннің негізгі талабы – білімді адамды әлемнің бүтіндей ғылыми бейнесін қабылдай алатын, белсенділік таныммен тікелей қатынас жасай алатын, жаңаша ойлай алатын құзіретті тұлғаға айналдыру.

Оқушыларда әлемнің көп бейнелі жақтарын терең ғылыми таным негізінде қабылдай алу қабілетін дамыту қажет. Осының негізінде интеллектуалды, креативті ұрпақты тәрбиелеп оқыту педагогика мен психологияның маңызды мәселелерінің бірі деп білеміз.

Әрбір жеке адамның қабілетінің дамуының жоғары жетістігі тек сол адамның ғана жеке басының даму көрсеткішіне ғана емес, бұл қоғам дамуына да, өркендеуіне де едәуір әсер етеді.

Мектеп практикасында қазіргі уақытта педагогикалық мақсатқа сәйкес жаңалықтар көптеп енгізілуде. Ол жаңа технологиялық сабақтар. Бұл сабақтарды өткізу барлық мектептерде кездеседі, бірақ осы сабақтардың оқу - тәрбие саласындағы түрлі ұғымдарды қалыптастыру және дамытудағы орны, маңызы мен жүйесі теориялық тұрғыда негізделіп, толық зерттелмеген. Сол себепті осы сабақтарды әдістемелік жағынан жүйелі, дұрыс ұйымдастыру, нақтылы мақсатта өткізу жүйесі жекелеген пәндерде толық құрылмаған.

Әрбір оқу пәні оқушылардың белсенділігін арттыруға әсерін тигізуі керек. Белсенділікті біз адамның жете түсінудегі талпынысынан туындайтын белгілі зерттеушілік және қоғамдық пайдалы маңызы бар міндеттерді шешуге жетудегі әрекетшіліктің жоғары сапалы деңгейі деп анықтай аламыз.

Ғалымдардың пікірінше белсенділік, жаңа пікірлер тудыруға жеткізеді. Қазіргі кезде танымдық белсенділік аса маңызды, себебі авторитарлық шешім мезгілі өтті, вертикальдық ойлау, пікірлер мен міндеттер жоғарыдан берілу кезеңдері қалды, енді әркімнің еркін ойлауын, жеке шығармашылығын қажет ететін уақыт келді.