"Мамандығым - мақтанышым"

Ұстаздық мамандық –барлық мамандықтардың анасы. Ұстаздың алдынан білім нәрімен сусындамаған адам баласы жоқ. Бала бойына ата-анадан кейінгі ақыл-ой, адамгершілік, әдептілік, ұлттық сана-сезімді сіңіруші адам – мұғалім екені белгілі.

Мен бала кезімнен ұстаз болуды арман еттім. «Ұстазы жақсының-ұстамы жақсы» деген сөз өте жақсы айтылған. Менің алғашқы ұстазым Марьяш Шағатаева-өз еңбек жолын ең алғаш бізге сабақ беруден бастаған еді. Апайымның әр сабағында берген білімі мен тәрбиесі өз алдына, аналық мейірімін сезінуші едім. Содан бері мен болашақта кішкентай балалармен жұмыс жасаймын деп ой түйген болатынмын. Алғашқы ұстазыма ұқсағым келді.

Арманыма жетіп, өзім де ұстаз атандым. «Мектептің жүрегі-ұстаз» демекші, өз мамандығыма сүйсініп еңбек етіп келе жатқаныма 20 жыл толды. Осы мамандықты таңдағаныма еш өкінген емеспін. Әсіресе, алғашқы ұстаз болып –әр шәкірттің есінде қалатын, бастауыш сыныптың мұғалімі болу маңызды екенін білдім. Осы 20 жылдың ішінде алдымнан қаншама шәкірт тәрбие мен білім алып ұшты. Өткен жылы бесінші түлектерімді ұшырдым. Төрт жыл бойы алдымда отырып, әр сабақта берген білімді шыңдап, мұғалім мен оқушы арасындағы сыйластықты ұғынған сүйікті шәкірттерді шығарып салу, қиын-ақ. «Бала жүрегі- кішкентай күй сандық. Сол сандықтың кілтін тапсаң ғана ашылады. Мұғалімнің қолында әр кезде сол кілт тұру керек» - деп, М. Шаханов ағамыз айтқандай,  әр баланың жүрегіне жол табу, бала бойындағы дарынды ашу мұғалімнің ең басты міндеті деп ойлаймын. Сыныбымда өнер мен білімді қатар алып жүрген оқушыларым аз болған жоқ. Үш оқушым Қостанай қаласындағы , «Дарын» мектебіне өз күштерімен сынақтан өтіп, түсті. Ол да менің-жетістігім.

Биылғы оқу жылында алдыма тағы да он сегіз оқушы , он сегіз кіп-кішкентай бүлдіршін келді. Ендігі алдағы төрт жыл бойы осы оқушыларға оқу мен жазуды үйретумен қатар, қазіргі өмір талабына сай қабілетті етіп тәрбиелеу-менің ұстаздық міндетім. Бүгінгі ұстаз шәкіртіне ғылым негіздерінен мәлімет беріп қана қоймай, оны дүниежүзілік білім, ақпарат, зкономика кеңістігіне шығуға үйретеді. Ұстаздық жол –ауыр жол. Сол ауыр жолды жүрегінің қалауымен таңдаған адам ғана өз мақсатына жете алады. Шәкіртінің жанына нұр құйып жүретін ұстаздардың жөні де, жолы да бөлек. Өзім сияқты осы қиын да, қызықты мамандықты таңдап, шәкірттерінің биік белестерге шығуына бар еңбегін аямай жүрген ұстаздар қауымын келе жатқан төл мерекелерімен құттықтаймын! Еңбектеріңіз жанып оқушыларыңыз Отанымыздың беделді азаматы, елін, жерін қадірлейтін жанашыры болып өсе берсін!!!

Сапабекова Ақзада Сәлімжанқызы

Б.Майлин ауданы, Сапар Ерғалиев атындағы орта мектебі, бастауыш сынып мұғалімі.