Мамандығым – мақтанышым

Мамандықтың жаманы жоқ, бірақ оның кез келгеніне икемділік қажет,

бұл жай күнелту, тамақ асыраудың ғана жолы емес,

үлкен өнерді, зор шеберлікті қажет ететін нәрсе.

(Ж.Аймауытов)

Менің мамандығым – мұғалім. Мұғалім болу – жай ғана бір кәсібі бар адам болу емес, ол – жүректің таңдауы, рухтың биік жауапкершілігі. Әсіресе қазақ әдебиетімен қатар жүретін ұстаздық мамандық – мен үшін өмірімнің мәні, болашаққа қалдырған ізім. Қазақта «Ұстазы жақсының – ұстанымы жақсы» дейді. Мен осы сөздің тереңдігін ұстаздық жолына бет бұрғанда анық түсіндім. Себебі мұғалім – шәкірттің жүрегіне алғаш білім шырағын жағып, оның жан дүниесін кемелдендіретін тұлға.

Қазақ тілі мен әдебиеті пәнінің мұғалімі болу – тек кітап оқыту, грамматика, сөз таптары мен ережелерді түсіндіру емес. Ол – адам тәрбиелеу, рух қалыптастыру, жүрекке жылу беру. Абайдың «Адам баласын заман өсіреді, кімде-кім жаман болса, замандасының бәрі виноват» деген сөзі бар. Бұл сөз мұғалімнің қоғам алдындағы орасан жауапкершілігін көрсетеді. Өйткені біз тәрбиелеген әр бала – ертеңгі елдің болашағы, мемлекеттің тірегі. Шәкірттерімнің әрбір жетістігі – менің еңбегімнің көрінісі, ал олардың адами қасиеттерінің қалыптасуы – менің шынайы жемісім деп білемін.

Мұғалім мамандығының ең жақсы тұсы – күн сайын жаңа жүректерге жол табу, жаңа ойларға түрткі болу, әр баланың жан дүниесін тану. Мен үшін әр оқушы – ашылмаған кітап, зерттелмеген әлем. Ыбырай Алтынсарин «Маған жақсы мұғалім бәрінен қымбат» деген. Себебі жақсы мұғалімнің алдынан өткен бала – өмірдің талай сынағында сүрінбей, еңсесін тіктеп жүре алады.

Бұл мамандықтың қоғамға берері өте көп. Мұғалім – болашақты тәрбиелейтін ерекше күш. Қоғамның мәдениеті де, білім деңгейі де, адамдық қасиеті де білім беру саласымен тығыз байланысты. Ұстаз, мектеп арқылы оқушы адамдықты, әділдікті, мейірімділікті таниды. Көркем сөз, әдеби шығармалар, өлеңдерді оқу арқылы олардың ойы тереңдеп, қиялы кеңейеді. Сондықтан қазақ тілі әдебиеті пәнінің мұғалімінің орны – өлшеусіз, бағасы – биік.

Келешекте де бұл мамандық мені жаңа белестерге жетелейтініне сенемін. Себебі ұстаздың өмірі – үздіксіз білім, шексіз ізденіс. Мен таңдаған жолыммен мақтанамын. Өйткені мұғалім болу – жүрекпен жасалатын, рухпен атқарылатын киелі борыш. Ал әдебиет маманы болу – сол бoрышты сөздің күшімен, парасаттың нұрындай жеткізу. Менің мамандығым – менің мақтанышым, өмірлік жолым және адамдық миссиям деп білемін.

.................................................

............................. қаласы,

«................. мектеп-гимназиясы»КММ

Қазақ тілі мен әдебиеті пәнінің мұғалімі