“Мәңгілік махаббат қайда кетті?”-Жас отбасылар неге жиі ажырасады?

«Мәңгілік махаббат қайда кетті?» — Жас отбасылар неге жиі ажырасады?

Автор: Казиоллина Ақжан Тлегалиевна

Қазақ қоғамы үшін отбасы — қасиетті ұғым. Ата-бабаларымыз «Отан — отбасынан басталады» деп бекер айтпаған. Алайда соңғы жылдары жас отбасылардың ажырасу деректері күрт өсіп, бұл құндылықты сақтап қалу өзекті мәселеге айналып отыр. Әлеуметтік желіде басталған махаббат бір-екі жылда өкінішке айналуы — кездейсоқтық па, әлде заманауи қоғамның жаңа шындығы ма?
Жағдайдың бет-бейнесі:
Қазақстанда 2023 жылы 120,8 мың жұп некеге тұрса, олардың 16,8 мыңы ажырасып кеткен. Бұл көрсеткіш еліміздегі ажырасу деңгейінің жоғары екенін көрсетеді. Ажырасудың жалпы коэффициенті 1000 адамға шаққанда 2,02 құрады. Ажырасудың ең жоғары деңгейі Шығыс Қазақстан облысында тіркелді — 1000 адамға шаққанда 3,14. Ал ең төменгі деңгей Түркістан облысында болды — 1000 адамға 0,89. Осылайша, 2023 жылы 1000 некеге 333 ажырасудан келген.
Ал енді “Неге ажырасады?” деген сұраққа тоқталсақ…
Біріншіден, Коммуникация дағдарысы:
Жас жұптар бір-бірімен ашық сөйлесуді білмейді. Кикілжіңдерді шешудің орнына үндемей кету немесе керісінше, ұрыс-керіс арқылы шығу іздеу — қарым-қатынасты тығырыққа тірейді.
Сонымен қатар, Жас отбасылардың көпшілігі тұрмыстық қиындықтарға төтеп бере алмайды. Үй, жұмыс, бала бағу — бәрі бірге келгенде, екеудің арасына сына түседі.
Екіншіден, Қоғамдық қысым:
Әлеуметтік желідегі «мінсіз өмірлерді» көрген жастар шынайы өмірдің қиындығын қабылдай алмайды. Махаббатты кино мен Instagram фильтрінен іздеу — шынайы сезімдерге балта шабады.
Үшіншіден, Туыстардың араласуы:
Сарапшылар елдегі ажырасудың негізгі себебі ретінде туыстардың араға түсуін (61%), моральдық шектеулердің болмауын (41%) және ажырасу процесінің жеңілдігін (25%) атап өтеді.
Сарапшы пікірі:
Психолог Айжан Бақдаулетқызы бұл мәселені былай деп түсіндіреді:
«Жастар көбіне өздерін тұлға ретінде қалыптастыра алмайды, өз орнын таба алмайды, отбасында өзін керексіз сезінеді. Бұл — отбасылық өмірге дайын еместіктің белгісі.»
Махаббат — өмірдің ең әдемі сыйы. Бірақ оны сақтап қалу — тек жүректің емес, ақыл мен сабырдың да ісі. Жас отбасылардың баянды болуы — болашақ ұрпақтың тағдыры. Сондықтан әрбір неке — ұлттың тірегі екенін ұмытпайық.