Мақала

Тәуелсіздікті сақтау-парыз

Осы орайда өткенге көз жүгіртпей болмас. Себебі, «…тарихты білмей,болашақты болжай алмайсың» деген қанатты сөз бар. Осы тәуелсіздікті аңсаған бабаларымыздың жаны пида болып, қаншамасының қаны төгіліп, небір қиындықтарды көрмеді десеңші?! Кешегі өткен от ауызды,орақ тілді шешен билеріміздің, етігімен су кешкен ерлеріміздің айбынды іс-әрекетімен ел мен жеріміз аман сақталып қалғаны тарихтан белгілі. Бүгінде тәуелсіз мемлекетімізді мәңгі қастерлеу,өз Отанымыздың лайықты азаматы болу-бәріміздің қасиетті борышымыз. Қазіргі таңда Елбасы Н.Назарбаевтың сындарлы саясатымен әлемдегі бәсекеге қабілетті елдердің қатарына кіру жолында игілікті іс-қимыл, ауқымды шаралар жүзеге асып жатыр. Бірлік пен татулықты ту етіп, ел экономикасын еселеуге үлес қосу-әр қазақстандықтың міндеті. Біз мұғалімдер, өз үлесімізді саналы да, тәрбиелі шәкірт тәрбиелеу арқылы қосамыз. Білім алу-жақсылыққа ұмтылу. Ал, жақсылық жасау өзіңнің болашағыңның жарқындығының кепілі. «Тәуелсіз ел тірегі-білімді ұрпақ», -деп Елбасы айтқандай, ел болашағын тәрбиелеп, елдің іргесінің мықты болуына өз үлесімізді қосып жатқанымызға мақтанамыз әрі жауапкершілік жүгін де сеземіз. Ел тәуелсіздігінің ширек ғасырлық тойы қарсаңында:

Тәуелсіздік-Құраным,

Тәуелсіздік-жыр-әнім,

Тәуелсіздік-тұрағым,-

Деген ақын сөздері ойға оралып, тәуелсіздігіміздің тұғырының мәңгі болуын тілеймін.

Ж.ЗАРЛЫҚОВА