Мақала " Рухани жаңғыру өзіңнен басталады"

Рухани жаңғыру өзіңнен басталады

«Рухани жаңғыру әр адамның өзінен басталмақ.

Өмір сүру үшін өзгере білу  керек.

Оған көнбегендер тарихтың шаңына көміліп қала береді.»

Н.Ә. Назарбаев 

  ҚР Президенті - Нұрсұлтан Назарбаевтың «Болашаққа бағдар: рухани жаңғыру» атты мақаласында Қазақстанның үшінші жаңғыруы басталғаны туралы жариялағаны баршамызға аян.

Қазіргі уақытта латын әліпбиіне көшу қарқынды түрде жүзеге асуда. Сөздің тереңіне батпай жатып, дүрлігудің қажеті жоқ. Тағылымы мол тарихымызға көз жүгіртер болсақ, бабаларымыз сонау заманнан сол әліпбиді қолданған болатын. Елбасымыздың бар жеткізгісі келген ойы - түбіміз түркі болған соң, түркі және жаһандық әлеммен ықпалдасуға қадам жасау, ұлтымыздың санасын тор бұғаудан босатып, санамыздың қайта жаңғыруына жол ашу. Біз бұл арқылы бүлдіршіндерімізге жарқын болашақ сыйлаймыз, тілімізге екінші дем береміз, арыла алмай келе жатқан жат әріптерден құтылып, әлем кеңістігіне еркін саяхаттауға мүмкіндік аламыз. 

Тәуелсіз мемлекетіміз жылдан-жылға қарыштап, өсіп-өркендеп, отандық ғылым-білім саласы дамып келеді. Қуантарлығы бүгінде мектеп шәкірттері даярлық сынып, бастауыш сыныптардан-ақ ағылшынша үйренуде. Жастардың көбі ағылшын тілін жақсы меңгеруде. Әлеуметтік желілерде де ағылшынша жазатын жастардың дені күннен күнге артуда. Латын әліпбиі соған ұқсас болғандықтан, көп кешікпей көпшілік арасында кең таралып, ауқымы кеңейе түсетініне сенімдімін. Сондықтанда латын әліпбиіне көшуден қорқуға еш негіз жоқ деп ойлаймын.Бүгінгі болашақ жастары жоғары белсенділік танытып отыр. Өйткені, рухани жаңғыруды әркім өзінен бастау қажет. Ал, рухани жаңғыру дегеніміз ол – адалдық, әділдік, ішкі жан тазалығы. Латынға көшу болашағымыздың жарқын болуына көмектесетініне сенеміз.

Олай болса, «Рухани жаңғыру өзімізден басталады» демекші, көп сөзді доғарып, еңсемізді тіктейік! Әрқайсысымыз өзімізге бір-бір міндет жүктейік! Ынтымағымызды ыдыратпай, бірлігімізді жоғалтпай, әрбір істі жұмыла бірігіп атқарсақ, ауыр жүгіміздің жеңілдері анық. Біздің міндетіміз жаңа ағымдардан және технологиялық үрдістен хабардар болу. 
Елімнің ертеңі жарқын болсын! Лайым, көгілдір туым мен қасиетті көк байрағым бейбіт көгімде желбірей берсін деген жүрекжарды тілегім бар!

Қостанай қаласы әкімдігінің білім бөлімінің

Б.Момышулы атындағы №5 орта мектебінің

қазақ тілі мен әдебиет пәні мұғалімі

Шарипбаева А.А.