Тәрбиеші – аса жауапты және құрметті міндет.

Мектепке дейінгі тәрбие мен оқыту – баланың тұлғалық дамуының негізін қалайтын аса маңызды кезеңдердің бірі. Бұл кезеңде баланың алғашқы дағдылары қалыптасып, өмірге деген көзқарасы, мінез-құлқы және танымдық қабілеттері дамиды. Осы маңызды міндеттерді орындауда тәрбиешінің рөлі айрықша. Мектепке дейінгі топ тәрбиешісі – тек білім беруші ғана емес, сонымен бірге әр баланың тұлғалық әлеуетін ашуға көмектесетін жанашыр жетекші деп есептеймін.

Тәрбиеші ең алдымен, балалардың қауіпсіздігін сақтауға міндетті. Ол әрдайым топтағы балалардың денсаулығын бақылап, жарақат алу қаупінің алдын алуға жауап береді. Баланың жас ерекшеліктеріне сәйкес білім беру бағдарламаларын әзірлеу және оны жүзеге асыру да – тәрбиешінің басты міндеттерінің бірі. Оған ойын түріндегі сабақтарды өткізу, логикалық және шығармашылық тапсырмалар арқылы баланың танымдық қабілеттерін дамыту кіреді. Мектепке дейінгі жастағы балалардың көпшілігі алғаш рет қоғамдық ортаға енеді. Сондықтан тәрбиеші балалардың өзара қарым-қатынасын реттеп, бір-бірімен достық, ынтымақтастық негізінде әрекет етуге үйретеді, яғни, әлеуметтік дағдыларды қалыптастырады.

Баланың дамуы мен тәрбиесінде отбасының рөлі зор. Тәрбиеші ата-аналармен тығыз байланыс орнатып, баланың мінез-құлқы мен жетістіктері туралы ақпарат бөлісуі тиіс. Сондай-ақ, ата-аналарға қажетті кеңестер беріп, тәрбиелеу бойынша қолдау көрсету – тәрбиешінің жауапты міндеттерінің бірі.

Мектептегі тәрбиешілердің еңбегі – болашақ қоғамның негізін қалыптастырудың маңызды бір бөлігі. Баланың осы кезеңдегі алған тәрбиесі мен білімі оның бүкіл өміріне әсер етеді. Сондықтан тәрбиешінің кәсіби біліктілігі, жауапкершілігі мен адалдығы – білім беру саласының сапасын арттырудың кепілі.

Қорытындылай келе, мектепке дейінгі тәрбиешінің жұмысы аса жауапты және құрметті міндет дер едім. Өз қызметімде бүлдіршіндерге тек білім берумен шектелмей, әр баланың жүрегіне жылу сыйлайтын, олардың өмірлік жолына бағыт беретін тұлға болсам деген мақсатпен жұмыс жасап келемін.

Рамазанова Нургул Отепбаевна

Қостанай облысы әкімдігі білім басқармасының Жанкелдин ауданы білім бөлімінің «Қаратүбек жалпы білім беретін мектебі» КММ-сінің тәрбиешісі