Мақала "Әз болмай-мәз болмаймыз!"

Әз болмай-мәз болмаймыз!

.

Көктем шуағы төгіле, жердің көбесі сөгіле, самарқанның көк тасы еріп, жерімізге, елімізге және де бір қасиетті әз наурыз келіп жетті. Бар мұсылман қауымы тойлаған қасиетті Наурыз мерекесі бар әлемге жаңа тыныс, жаңа өмір алып келген табиғат құбылыстарының ішіндегі қыстың ызғары кететін, көктемнің лебі есетін, бір жылулық, жайлылық алып келетін қасиетті түбі бір түркі халықтарының мерекесі.Ия, Әз болмай-мәз болмаймыз, сәуір келмей тәуір болмаймыз деген қазақтың жорамал, тұспал сөздері дәл келеді. Бәріміз мәз болдық. Дана халқымыз көне есеп амалдармен есептеп наурыз мерекесі ұлыстың ұлы күні деп, жаңа жыл деп қабылдаған. Наурыздың 21 –нен 22 не қараған түні күнмен түннің теңеліп, бір нүктеге келетін күні, жаңа жылдың жаңа есіктен кіретін күні. Сондай-ақ адамның алақанына он екі айды сиғызып, саусақ салалары бойынша күннің ең ұзаруы мен қысқаруын есептеп шығарған. Бұл философиялық тұрғыдан дәлелденген.

Қазақ дәстүрі атадан балаға, мирас болып сақталған. Ұлттық құндылығымыз дәріптеліп отырған. Бұл мереке күні күннің шуағы төгіліп, жер Ана бусанатын, жерге қылтиып көк шығатын, үйге ырыс кіретін, ыдысымыз аққа толатын, Қыдыр ата келіп, бата беретін, береке мен бірлікке шақырған ұлық мереке. Ақ жаулықты әжелеріміз сапырып көже құйған, шашу шашып, шаттыққа бөлейтін күн. Біз өз құндылықтарымызды көрсетіп жатамыз, бірақ дәл бүгінгідей емес, осы мерекеде бар салт-дәстүрімізді түгендемесек те барынша ортаға алып шығып көпшілікке көрсетіп, көз айым болып қаламыз.

Міне биылғы Наурыз мерекесі Майоровка ауылында да айрықша аталып, ауқымды түрде өтті.Сондай-ақ, Абдолла Асылбеков атындағы ЖОББ мектебінде шағын орталықта және мектеп алды даярлық тобында арнайы әзірленген тәрбие сағаттарымен басталып ойын-сауық номерлерімен жалғасты. Сонмен қатар мектепте әрбір сынып оқушылары арнайы әзірлеген қазақтың салт-дәстүрін көрсетіп, наурыз туралы әндерді шырқап, би биледі. Бәрі де тамаша көктемгі көңіл-күйде жақсы өтті. Сондай аулымызда көше болып дайындалып, « Бір жеңнен қол, бір жағадан бас шығара» отрып ұйымдасып өз өнерлерін көрсетті. Ия, салт-дәстүрдің, әдет-ғұрыптың дәріптелуі өте ұлылық, .Бұл күні жақсы тілек тілеу, құттықтау, кешірім жасау, табысу сияқты адамгершілік қасиеттер көрініс тауып, кейінгі ұрпақтар сондай жақсы өнегеден үлгі алған.

Наурыздың айрықша тәлім-тәрбиелік, үлгі-өнегелік, сән-салтанаттық, мәрт-жомарттық, қадір-қасиеттілік нышан белгілері мен таным  ұғымдарының үлгі түрлері өте көп.Оның барлығы әр адамды жоғары саналылыққа, әдептілікке, өнегелікке, бауырмалдыққа, көргенділікке, ізгілік пен білімділікке баурайды. Наурыз мерекесін асыға күтетініміз, ерекше даярланатынымыз содан болса керек.Наурыз мерекесіне тән — көпшілікке наурыз көже даярланады, ол тағам жеті түрлі дәмнен даярлануы шарт. Халықта наурыз көжені тойып ішкен адам келесі жылға дейін  ішім-жемнен тарлық көрмейді деген ұғым бар. Сондықтан біз өз ұлтымыздың жан дүниесін біле, дәстүріне үңіле, мақалына жүгіне білмесек, біз өзімізді жоғалтамыз. Ендеше ұлттық құндылықтарымызды сақтай, кейінгі ұрпаққа жеткізе білейік ағайын!

Майоровка ауылы

Абдолла Асылбеков атындағы ЖОББ мектебі

кітапханашы

Тоқан Сәбира.