Әлеуметтік желілердің жастар өміріндегі рөлі: Жаңа мүмкіндіктер мен ықпал

Қазіргі жастар үшін әлеуметтік желілер – күнделікті өмірдің ажырамас бөлігі. Таңертең оянғаннан бастап, ұйықтар алдындағы сәтке дейін телефон – біздің ең жақын серігіміз. Бұл жағдай қоғамға, әсіресе жастардың дүниетанымына елеулі әсер етуде.

Бір жағынан, әлеуметтік желілер – білім алуға, ақпаратты жылдам таратуға және шығармашылық әлеуетін ашуға таптырмас алаң. Мысалы, жастар өз ойларын ашық айтып, тәжірибелерімен бөлісіп, мотивация беретін контент жасайды. Онлайн білім беру платформалары мен курстар жастардың білім деңгейін арттырып, жаңа мүмкіндіктер есігін ашады. Әлеуметтік желілер арқылы жастар өздерін танытып, мақсаттарына жетудің жаңа бағыттарын таба алады.

Сонымен қатар, бұл виртуалды кеңістіктің кемшіліктері де бар. Көптеген жасөспірімдер онлайн әлемге қатты беріліп, шынайы өмірден алыстап кетеді. Экран алдында өткізілген уақыт денсаулыққа, ұйқыға және психикалық жағдайға зиян келтіреді. Әсіресе, лайк пен қаралымды қуалайтын жастар өз-өздерін желідегі пікірлер арқылы бағалай бастайды. Бұл өз-өзіне сенімсіздік пен стресске әкелуі мүмкін.

Соңғы зерттеулер нәтижесінде белгілі болғандай, қазақстандық жастардың басым бөлігі (70%-дан астамы) күніне 4-6 сағат уақытын әлеуметтік желілерде өткізеді. Бұл мәселе қоғам назарын аударуға тұрарлық. Себебі, бұл уақытты тиімсіз пайдалану білім алуға, денсаулыққа және жеке дамуға кері әсерін тигізуі мүмкін.

Сонымен қатар, әлеуметтік желілерде таралатын жалған ақпарат, агрессивті пікірлер мен кибербуллинг жастардың психологиялық жағдайына зиян келтіреді. Көптеген жасөспірімдер желідегі жағымсыз пікірлерге байланысты күйзеліске ұшырап, өз-өзіне деген сенімін жоғалтады. Осыған байланысты мектептер мен ата-аналар кибермәдениет және интернет этикеті туралы білім беруге баса назар аударуы қажет.

Дегенмен, әлеуметтік желілерді тиімді пайдаланудың арқасында көптеген жақсы мүмкіндіктерге қол жеткізуге болады. Мысалы, жастар экологиялық жобаларды, волонтерлік қызметтерді және қайырымдылық акцияларын осы желілер арқылы ұйымдастыруда. Яғни, интернет қоғамға пайдалы істерге атсалысуға мүмкіндік береді.

Қорытындылай келе,әлеуметтік желілер – бұл біздің өміріміздің бір бөлігі, бірақ бүкіл өмір емес! Оларды пайдалану мәдениеті өзімізге байланысты екенін есте сақтау маңызды. Әлеуметтік желілердегі энергиямызды өзімізді дамыту мен шабыттануға бағыттайық. Шынайы өмір – экранның ар жағында емес, жақындарымызбен өткізген сәттер екенін ұмытпайық. Шынайылықты бағалайық!