Түлектен тілек

Міне, 11 жыл бойы білім алған алтын ұя – Мектебімізбен де қоштасар сәт келіп жетті.Өміріміздің 11 жылын, балғын балалық шағымыз бен бозбала-бойжеткен кезімізді өткерген киелі қарашаңырағымызбен қош айтысар кезде бойымызды қимастық сезімі билеп тұрғанын қалайша жасырайық!

Бүлдіршін болып мектеп табалдырығын аттап, қолымызға қалам ұстағаннан бері азамат болып қалыптасқанға дейін еркелігімізді көтеріп, өмірдегі өз орнымызды табуға деген ынтамызды ұштап, жігерімізді жаныған Ұстаздарымызды да қимаймыз.

Біз бүгін мектебімізбен, ұстаздарымызбен қош айтысып, үлкен өмірге қадам басқалы тұрмыз.Алдағы өмірімізде қай қияда жүрсек те, қандай биіктерге жетсек те тек алтын ұя – мектебіміз бен ұстаздарымызға мәңгілік қарыздармыз.Біз үшін атқарған еңбектеріңіз ұшан-теңіз.Сол үшін де біз сіздерге борыштармыз.Сіздердің алдарыңыздағы шәкірттік парызымызды адал ақтайтынымызға сендіргіміз келеді.

Ұшқалы тұрса ұядан,

Мектепті шәкірт қия ма?!

Мектебім, саған мың тағзым,

Барамыз ұшып қияға!

Талаптың туын ұштадың,

Жинадық бойға күш қалың.

Көре бер жылдан-жылға сен,

Түлектің түлеп ұшқанын,

Мың алғыс саған, Ұстазым!

Қош, аяулы мектебім! Қош, ардақты Ұстаздарым! Біз сіздерді мәңгілік ұмытпаймыз! Біз сіздердің алтын аттарыңызды мәңгілік ұлықтаймыз!

Үлкен ізетпен – Алмалы ЖОББ мектебінің 2021 жылғы мектеп түлектері.

25 мамыр, 2021 жыл.

АЛМАЛЫ