«Мектеп тынысы» - оқушы жұмысы

«Мектеп тынысы» - оқушы жұмысы

Атақты француз философы Альберт Камю өзінің бір даналығында «Мектеп бізді дүниеде жоқ өмірге даярлайды» деген екен. Расымен, мектеп табалдырығын аттаған бала оқумен қатар коммуникация құрып, шығармашылығын шыңдап, топтасып жұмыс істеу дағдыларын үйренеді. Сондықтан ұстазға жүктелетін жауапкершіліктің салмағы зор.

Осыны ескере отырып, Шу аудандық білім бөліміне қарасты Төле би атындағы орта мектепте білім мен тәрбие ісіне ерекше ден қоюда. Оның ішінде шәкірттердің жұртшылық алдында өз ойын еркін білдіру, журналистикаға баулу, қоғаммен байланыс орнату бағыты қолға алынуда. Бұл өз кезегінде оқушыларды болашақ мамандығына бейімдеу, базалық білімді қалыптастыру ісіне септігін тигізетіні сөзсіз.

Мәселен, ұстаздардың ұйымдастыруымен әлеуметтік желілердің әлеуетін пайдалана отырып мектеп ішіндегі жаңалықты жұртшылыққа жеткізу жұмысы жолға қойылған. Болмасаң да ұқсап бақ деген Абай хакімнің нақылын ту еткен оқушылар экран алдында өзін-өзі ұстау мәдениетін қалыптастырып, тіл тазалығы мен дауыс қою машықтарын игеруде. Тележүргізуші болуға талабы бар оқушалар үшін мектепішілік «Мектеп тынысы» топтама жаңалықтары таптырмас тәрбие құралына айналды.

Мектеп әкімшілігінің мұндай қадамы мектеп түлектерін келешекте шығармышылық емтихандарынан мүдірмей өтуге мүмкіндік жасап, құлшыныстарын бекіте түсуге талпындырады. Себебі журналистика сынды мамандық таңдаған түлек ең алдымен шығармашылық емтихан тапсырып, жазған мақалалар жинағы мен бейнематериалдарын ұсынады. Осы сәтте оқушының мектепте жинаған дағдысы көмекке келеді.

Жасыратыны жоқ. Бүгінгі таңда жас буын өз ойын таза, тұнық жеткізе алмайды. Оған әлеуметтік желі үйреткен тіл «өз үлесін» тигізуде. Сонымен қатар бояуы қанық шетел фильмдері де ықпал етіп жатқанын жасыра алмаймыз. Сондықтан «Мектеп тынысы» сынды жаңалықтар топтамасы осы кемшіліктерді жоюға тікелей қатыса алады. Себебі болашақтың сауатты адамын даярлауда ұстаздардың рөлі маңызды.

Тіл тазалығы – ой тазалығын қалыптастырады. Бір ғана М.Әуезовтың «Абай жолы» роман-эпопеясында қазақтың қайталанбайтын 17 мыңға жуық сөз бар. Осыған қарап-ақ тіліміздің қаншалықты бай, қаншалықты шұрайлы екенін аңғаруға болады. Біз осыны жадымызда тоқып, жас ұрпақ тәрбиесіне сіңдіруіміз қажет.

Сондықтан, бұлақтың көзін ашуға баулитын «Мектеп тынысы» жаңалықтар топтамасының ұстаздарға да, оқушыларға да, ата-аналарға да берері мол. Келешекте бұл бағыттағы жұмыстар жанданып, жалғаса беретініне сіздерді сендіреміз.