БАЯНДАМА

Құндылыққа негізделген тәрбие: Мектептегі әлеуметтік педагогтың рөлі

Балалардың құндылық бағдарларын қалыптастыруда ата-аналармен біріге жұмыс жасап, олардың бала тәрбиесіне белсене араласуына да мән берген жөн. Бұл бағытта мектеп әкімшілігі сараланған жоспар құрып, “мұғалім-оқушы-ата-ана” үштігі аясында нәтижелі жұмыс жасай алады. Сондықтан мен әлеуметтік педагог ретінде мұғалімдермен қатар, ата-аналармен, оқушылармен кешенді жұмыс жасап келемін. Әр оқу орнының өз құндылықтары бар, соларды айқындаған кезде балалармен жұмыс та жемісті бола түспек деген ойдамын.

Әлеуметтік педагог – оқушылардың әлеуметтік, психологиялық және тәрбиелік мәселелерін шешуге көмектесетін маман. Оның басты міндеті – бала мен қоғам арасындағы қарым-қатынасты үйлестіру, білім алушылардың құқықтарын қорғау және қолдау көрсету.

Әлеуметтік педагогтың негізгі функциялары:

1. Оқушылардың әлеуметтік жағдайын зерттеу

• Отбасылық жағдайын, материалдық мүмкіндіктерін, психоэмоционалдық ахуалын талдау.

• Тәуекел тобындағы балалармен (жетімдер, толық емес отбасынан шыққандар, мүгедектігі бар балалар) жұмыс істеу.

2. Психологиялық және педагогикалық қолдау

• Оқушылардың мектептегі қиындықтарын анықтау және шешу.

• Оқу үлгерімі төмен, тәртіптік мәселелері бар балалармен жеке жұмыс жүргізу.

• Құқықбұзушылықтың алдын алу шараларын ұйымдастыру.

3. Отбасымен жұмыс

• Ата-аналарға психологиялық және құқықтық кеңес беру.

• Ата-аналарды мектеп өміріне белсенді тарту.

• Баланың дамуына теріс әсер ететін факторларды анықтап, оларды жоюға көмектесу.

4. Мұғалімдер мен мектеп әкімшілігімен байланыс

• Мұғалімдерге қиын оқушылармен жұмыс жасау бойынша әдістемелік көмек көрсету.

• Оқу-тәрбие процесінде оқушылардың жеке ерекшеліктерін ескеру жөнінде ұсыныстар беру.

5. Қоғамдық ұйымдар және құқық қорғау органдарымен серіктестік

• Әлеуметтік қорғау органдарымен, полициямен, денсаулық сақтау мекемелерімен байланыс орнату.

• Балалардың құқықтарын қорғау және олардың әлеуметтік бейімделуіне жағдай жасау.

Әлеуметтік педагогтың маңыздылығы

Әлеуметтік педагог – бала, ата-ана және мектеп арасындағы көпір. Ол оқушылардың әлеуметтік мәселелерін шешіп қана қоймай, олардың толыққанды азамат болып қалыптасуына жағдай жасайды. Сонымен қатар, мектептегі жалпы тәрбие процесіне үлкен үлес қосады.

Құндылықтарды тек кітаптар мен оқулықтардан үйрену мүмкін емес, ол көбіне адамнан адамға дариды. Сондықтан біз мұғалімдерді оқушылардың мінез-құлқы мен мәдениетін қалыптастыратын өзгеріс агенттері ретінде қарастырамыз. Әсіресе қазіргі таңда мұғалімдер балаларға тек академиялық білім берумен шектелмей, оқушылардың бойында әртүрлі өмір жағдайына тез бейімделе алатын машықтарды ды дамыта білуі керек. Осы ретте мен әлеуметтік педагог ретінде педагогтарға жол көрсетіп, оқушылардың талпынысын арттыратын орта құруына көмектесіп келемін.

Осы ретте мектебімізде ұлттық құндылықтарымызды бала бойына терең сіңіру мақсатында әр апта дәйексөздері әр сыныптың есігіне ілініп, ол құндылықтардың мәні тереңінен ашылып талданып отырады. Пән мұғалімдері де осы дәйексөздерді сабақ мақсатына барыншы кіріктіріп жүр. . Шәкәрім: «Адамның жақсы өмір сүруіне үш сапа негіз бола алады, олар барлығынан басым болатын адал еңбек, мінсіз ақыл, таза жүрек. Бұл сапалар адамды дүниеге келген күннен бастап тәрбиелейді» деген болатын. Жалпыадамзаттық құндылық – рухани құндылық.

«Әділдік және жауапкершілік құндылығы»

Апта дәйексөзі:

• «Әділдік пен жауапкершілік - біртұтас ұғым!»

• «Тура биде туған жоқ!»

• «Жауапкершілік - адамгершілік қасиеттің көрінісі»

• Әділетте берік болсаң аяғың таймайды!»

Қорытынды:

Бұл – адамдағы ең терең маңыз­ды әрі мәнді бағдар. Адам соған сүйене отырып, шешім қабылдайды, әрекет етеді. Рухани құндылық адамдағы ішкі тұтастықты қамтамасыз етеді, күш-жігері мен өзіне деген сенімін арттырады, сонымен бірге, осы құндылықтың негізінде адамның өзіне, қоршаған ортаға деген қатынасы қалыптасады.

Қазіргі мектеп өмірінде әлеуметтік педагогтың рөлі өте маңызды. Ол оқушылардың жеке дамуы мен әлеуметтенуіне қолдау көрсетіп, олардың білім алуы мен тәрбиесіне кешенді түрде көмектеседі.