«Мен алғаш мұғалім болғанда...»

«Мен алғаш мұғалім болғанда...»

Менің таңдаған мамандығым – мұғалім. Әрине, ұстаз жүгі – ауыр жүк. Мен ұстаздықтың ауыр жүгін арқалауды өз жүрегімнің қалауымен таңдадым. Анам 10 жыл бастауыш сынып мұғалімі қызметін атқарып, жұмыс істеп келеді. Бала кезімде анамның сабақ бергенін көріп, оған қызыға да қызғана қарап, болашақта ұстаз болуды армандап, мақсат еттім. Міне, қәзір өзімнің армандаған мамандығым бойынша ЖШС «Каспий өңірі «Болашақ» колледжі» - нде білім алып жатырмын. Осы оқу орнында білім алып бастаған алғаш күнімнен-ақ мамандық таңдауда қателеспегенімді білдім. Ұстаз мамандығын таңдап, бұл оқу орнына түскеніме өте қуаныштымын. Себебі, өзіме жақын дос, сырлас таптым. Білмегенімді үйретіп, бар ақылын айтып, нағыз мұғалім қылып шығарған оқытушыларыма алғысым шексіз. Өзімнің арманымдағы мамандығыммен жұмыс істеуіме аз ғана уақыт қалды. Уақыт жақындаған сайын іштей толқыныс, қобалжу арта түседі. Мен болашақта қандай ұстаз боламын? Өзіме сеніп, балаларын берген ата-аналардың үмітін ақтай аламын ба? Алдыма келген бүлдіршіндердің білім алудағы іргетасын дұрыс қалай аламын ба? – сынды сұрақтар күніне ойландырады.

Мен алғаш мұғалім болғанда, өз-өзіме сенімді, оқушылар бойына əдеп, əдет, дағды сияқты жақсы қасиеттерді сіңіре алатын, ізденімпаз, рухани бай, адамгершілігі мол адамды қалыптастыра алатын, баланың екінші ата-анасы, болашаққа айқын жол сілтер ақылшысы боламын, - деп нық сеніммен айта аламын.

Елбасым Н.Назарбаевтың «Болашақта өркениетті дамыған елдердің қатарына ену үшін заман талабына сай білім қажет» деген сөздеріне ой жүгіртсек, мұғалім – ең қажетті мамандық. Білім алуға келген әр баланың қолынан жетектеп, өмір жолының дұрыс бағытына салу, елімізді әлемге танытатын, ата дәстүрді құрметтеген, ең бастысы Отанын сүйетін азаматты тәрбиелеу, осы жолда еңбекке баулу, мақсатына жетуіне көмектесу - ұлы мамандық иесінің негізгі міндеті. Осы себепті де мен мамандығымды мақтаныш етемін!