Жамбыл облысы Жамбыл ауданы

«Нұр-Мерей» бөбекжайы

Тақырыбы: Мен – тәрбиешімін

Тәрбиеші:Ермекова Нургуль Ибрагимовна

Мен – тәрбиешімін

Мен – тәрбиешімін. Бұл атақ мен үшін жай ғана мамандық емес, жүрек қалауымен таңдалған өмір жолы. Себебі тәрбиеші – баланың өміріндегі ең алғашқы ұстаз, ең алғашқы бағыт-бағдар беруші тұлға. Бала балабақша табалдырығын аттаған сәттен бастап оның әлемге деген көзқарасы, адамдарға деген сенімі, жақсылық пен жамандықты ажыратуы қалыптаса бастайды.

Ұстаз ретіндегі ең үлкен тілегім – әр баланың бақытты болып өсуі. Баланың күлкісі мен таза көңілі ешқашан сөнбесе екен деймін. Өйткені бүгін біз тәрбиелеген бала – ертеңгі ел тірегі, болашақтың иесі. Олардың бойына мейірім, адамгершілік, еңбекқорлық пен отансүйгіштік дәнін себу – біздің басты міндетіміз.

Тәрбиеші болу – үлкен жауапкершілік. Кейде шаршайсың, кейде өз еңбегің еленбей қалғандай сезінесің. Бірақ баланың «апай» деп жүгіріп келуі, алғаш рет әріп танып қуануы, бір-біріне көмектесіп жатқан сәтін көру – бар қиындықты ұмыттырады. Осындай сәттерде өз мамандығыңды тағы да мақтан тұтасың.

Менің ұстаз ретіндегі тілегім – білім мен тәрбиенің әрқашан қатар жүруі. Ақылды, бірақ мейірімсіз ұрпақ емес, жүрегі жылы, еліне жанашыр, үлкенге құрмет, кішіге ізет көрсете алатын азаматтар өссе екен деймін. Балаға берілген әрбір жақсы сөз, әрбір дұрыс бағыт – болашаққа салынған берік іргетас.

Сондай-ақ барша ұстаздарым мен әріптестеріме тілегім – еңбегіміз бағаланып, абыройымыз әрдайым биік болсын. Ұстазға құрмет – ұлтқа құрмет. Себебі ұлттың болашағы ұстаздың қолында. Біз тәрбиелеген ұрпақ елдің ертеңін айқындайды.

Ұстаз тілегі – жай ғана арман емес, ол ұрпаққа қалдырылған аманат. Сол аманатқа адал болу – әр тәрбиешінің қасиетті борышы деп білемін. Мен өз жұмысым арқылы балалардың жүрегіне жарық сәуле, өміріне сенім ұялатқым келеді. Бұл – менің ең үлкен тілегім.