Мен, Бабаева Аяулым Мұхтарқызы, Өскемен қаласы Опытное поле ауылында тұрамын жаңадан салынған жайлы мектептің 11ші сынып оқушысымын. Биыл мен үшін және барлық ауыл тұрғындары үшін үлкен қуаныш болды – жаңа мектеп салынды. Бұл – тек жай ғана мектеп емес, болашаққа бастайтын үлкен мүмкіндік, білім мен тәрбиенің алтын ордасы.

Жаңа мектепке алғаш кірген сәтте, оның кең де жарық дәліздері, әсем сыныптары мен заманауи құрал-жабдықтары бізді ерекше сезімге әкелді. Әрбір кабинетіміз толық жабдықталып, оқушыларға барынша қолайлы жағдай жасалған. Мұндай мүмкіндікті сыйлаған барша жанға шын жүректен ризашылығымды білдіремін және ризамын.

Бұл мектептің басты байлығы – біздің ұстаздар және мектеп директоры. Олар әрқашан бізді қолдап, білім мен тәрбиенің биігіне жетелеуде. Тек пәндерді ғана үйретіп қоймай, бізге үлгі болып, адамгершілікке, еңбексүйгіштікке, жауапкершілікке үйретеді. Осындай білікті, мейірімді ұстаздардан тәлім алып жүргенім үшін өзімді бақытты санаймын.Сонымен қатар бізге осындай мектептің ашылуына үлес қосқан, қолдауын білдірген мектепбіміздің- директоры Егорова Жанна Николаевнаға алғысымды білдіремін.

Биылғы оқу жылы біз үшін ерекше есте қалады. Себебі біз 11 «А» сынып – осы жаңа мектептің алғашқы түлектері болмақпыз. Бұл – біз үшін мақтаныш әрі үлкен жауапкершілік. Алғашқы түлек болу – тарихта қалатын мәртебе, оны біз әрқашан қуанышпен еске аламыз.

Менің жаңа мектебім – тек білім алатын орын ғана емес, достықтың, бақытты сәттердің мекені. Осында алған білім мен тәрбиеміз бізді үлкен өмірге жетелеп, асқақ армандарымызға жеткізеді.

Мен мектебімді ерекше жақсы көремін, сыныптастарым мен ортама ризамын. Жаңа мектебім – менің жарқын болашағымның бастауы,осында алған білімім мен тәрбием алдағы өмірімде көп көмегін тигізетініне сенемін!